నర్సాపురం ఎంపీ రఘురామ కృష్ణంరాజు తీవ్ర అస్వస్థతకు గురయ్యారంటూ సోషల్ మీడియాలో ప్రచారం జరిగింది. ఆయన ఇటీవల సర్జరీ చేయించుకున్నారని.. ఆయన ఆరోగ్య పరిస్థితిపై కొన్ని పోస్టులు కనిపించాయి. ఈ విషయం రఘురామకు తెలియడంతో స్పందించారు. ఓ వీడియోను విడుదల చేశారు. వైఎస్సార్‌సీపీ సోషల్ మీడియా వాళ్లు తనపై తప్పుడు ప్రచారం చేస్తున్నారని.. తీవ్ర అస్వస్థతతో ఉన్నానని పోస్టులు పెడుతున్నారని.. వాళ్లు కోరుకునేది ఇలాంటివే అంటూ మండిపడ్డారు.
ఇంత చేతకాని వెధవల్లా తయారయ్యారని.. తాను గత రెండు, మూడు రోజులుగా ఇంటర్వ్యూలు ఇస్తూనే ఉన్నా.. మీడియాలో కనిపిస్తున్నాను అన్నారు రఘురామ. తాను సంపూర్ణ ఆరోగ్యంతో ఉన్నానని.. ముంబైలో సర్జరీ విజయంతంగా జరిగిందని చెప్పుకొచ్చారు. తనకు ఎలాంటి హార్ట్ ఎటాక్ రాలేదని.. ఏంజైనా అనే ఆరోగ్య సమస్య రావడంతో వెంటనే అనుమానంతో పరీక్షలు చేయించినట్లు చెప్పారు. ముందస్తు జాగ్రత్తగా డాక్టర్ల సూచనతో ఈ బైపాస్ సర్జరీ చేయించుకున్నానని క్లారిటీ ఇచ్చారు.కొంతమంది మానసిక రుగ్మతతో ఇలాంటి ప్రచారం చేస్తున్నారని రఘురామ మండిపడ్డారు. ఖబడ్దార్ సోషల్ మీడియా ఫ్రెండ్స్.. ఈ దురాగతాలను అంతమొందించేందుకు ప్రజలు సిద్ధమవుతున్నారన్నారు. దయచేసి మారగలిగితే మారండి.. మారకపోతే ప్రజలే మార్చడానికి సిద్దంగా ఉన్నారని ఆగ్రహం వ్యక్తం చేశారు. ఎన్ని చెత్త రాతలు రాసినా.. ఎన్ని కుట్రలు చేసినా సరే.. అమరావతి రాజధానిగా ఉంటుంది.. 17కు ఏడాది కాబోతోందని గుర్తు చేశారు. త్వరలో కోర్టు నుంచి శుభవార్త వస్తుంది.. సోషల్ మీడియాలో పిచ్చి రాతల్ని నమ్మొద్దన్నారు.రఘురామ కృష్ణరాజుకి ముంబైలోని ఏషియన్ హార్ట్ ఇనిస్టిట్యూట్‌లో డాక్టర్ రమాకాంత్ పాండే నేతృత్వంలో బైపాస్ సర్జరీ విజయవంతంగా పూర్తిచేశారు. రెండు రోజులు ఐసీయూలో ఉండాల్సి ఉంటుందని వైద్యులు సూచించారు. ఆ తర్వాత కొద్దిరోజులు విశ్రాంతి తీసుకోవాలని డాక్టర్లు సూచించారు. చాలా రోజులుగా మీడియా ముందుకు రాకపోవడంతో.. ఆయన తన ఆరోగ్య పరిస్థితిపై సోషల్ మీడియా ద్వారా క్లారిటీ ఇచ్చే ప్రయత్నం చేశారు.