కరోనా వైరస్ మహమ్మారి మరింత తీవ్రమవుతుందా? అంటే అవునంటున్నారు మైక్రోసాఫ్ట్ సహ వ్యవస్థాపకుడు బిల్‌గేట్. సీఎన్ఎస్ మీడియాతో ఆయన ఆదివారం మాట్లాడుతూ.. రాబోయే నాలుగు నుంచి ఆరు నెలల్లో కోవిడ్ మరింత తీవ్రంగా మారే అవకాశం ఉందని, అందరూ జాగ్రత్తగా ఉండాలని బిల్‌గేట్ సూచించారు. అయితే, కోవిడ్ నిబంధనలను కచ్చితంగా పాటిస్తే వైరస్ ముప్పును అరికట్టవచ్చని అన్నారు.‘విచారకరమైన విషయమేంటంటే.. వచ్చే 4-6 నెలల్లో కరోనా ప్రభావం మరింత తీవ్రంగా ఉండే అవకాశం ఉంది. ఇనిస్టిట్యూట్‌ ఫర్‌ హెల్త్‌ మెట్రిక్స్‌ అండ్‌ ఎవాల్యుయేషన్‌ అంచనాల ప్రకారం మరో 2 లక్షల మరణాలు సంభవించే అవకాశం ఉంది... అయితే మాస్క్‌లు ధరించడం, భౌతికదూరం పాటించడం వంటి నిబంధనలను కచ్చితంగా పాటిస్తే ఈ మరణాల శాతాన్ని తగ్గించవచ్చు’ అని అన్నారు.‘కరోనా వైరస్‌ను అమెరికా మరింత సమర్ధవంతంగా కట్టడిచేస్తుందని భావిస్తున్నాను.. ఇటువంటి మహమ్మారి గురించి 2015లోనే నేను హెచ్చరించాను. మరణాల రేటు కూడా ఎక్కువగా ఉంటుందని చెప్పాను. అయితే అమెరికా సహా ప్రపంచదేశాల ఆర్థిక వ్యవస్థలపై కోవిడ్‌ ప్రభావం నేను ఐదేళ్ల కిందట అంచనా వేసినదానికంటే తక్కువగానే ఉండటం ఆశ్చర్యకరం’ అని బిల్‌గేట్స్‌ వ్యాఖ్యానించారు. కరోనా వ్యాక్సిన్‌ ప్రయోగాల కోసం బిల్‌ అండ్‌ మిలిండా గేట్స్ ఫౌండేషన్‌ సంపూర్ణ సహకారం అందిస్తోందని ఈ సందర్భంగా ఆయన స్పష్టం చేశారు.నిర్ధారణ, చికిత్స, వ్యాక్సిన్ తయారీలో శాస్త్రవిజ్ఞానం ఎలా ఉందో మనకు తెలుసు.. వీటన్నింటి అత్యవసరంగా ఒకే చోటికి చేర్చాలి... కాబట్టి మహమ్మారి విషయంలో మన నైపుణ్యం సాధారణంగా అభివృద్ధి చెందుతున్న దేశాలకు మాత్రమే కాకుండా మొత్తం ప్రపంచానికి వర్తిస్తుంది’ అని పేర్కొన్నారు. మానవత్వంతో అమెరికా సాయం చేస్తుంది.. అధ్యక్షుడు డొనాల్డ్ ట్రంప్ సంతకం చేసిన కార్యనిర్వాహక ఉత్తర్వుల ప్రకారం టీకా విషయంలో అమెరికన్లకు తొలి ప్రాధాన్యత ఇస్తుంది.ప్రపంచ ఆర్థిక వ్యవస్థ ముందుకు సాగాలని మేము కోరుకుంటున్నాం. మరణాలను తగ్గించాలనుకుంటున్నాం. మహమ్మారి నిరోధించి, దాని ప్రభావం నుంచి కోలుకోడానికి అంతర్జాతీయ భాగస్వామ్యం, సహకారం అవసరం..కాబట్టి, అన్ని వ్యాక్సిన్ల సామర్థ్యాన్ని పెంచుకోవాలి.. అదనంగా మరికొన్ని టీకాలకు ఆమోదం లభిస్తే కొద్ది నెలల్లో ఉత్పాదకతను పెంచుకోవచ్చు.. కానీ ఇతర దేశాల నుంచి లబ్ది పొందిన అమెరికా.. మనం ఎలా ముందుకు వెళ్తామనే విషయంలో పూర్తిగా స్వార్థపూరితంగా ఉండకూడదు’అని అభిప్రాయపడ్డారు.కరోనా వ్యాక్సిన్‌పై ప్రజల్లో భయాన్ని తొలగించి, విశ్వాసాన్ని పెంచేందుకు అమెరికా మాజీ అధ్యక్షులు బిల్‌ క్లింటన్‌, జార్జ్‌ బుష్‌, బరాక్‌ ఒబామాల్లాగే తాను కూడా బహిరంగంగానే టీకా తీసుకుంటానని బిల్‌గేట్స్‌ స్పష్టం చేశారు. వైద్యపరమైన అవసరాల వల్లే టీకా తీసుకుంటున్నామని, అంతేగానీ ఇందులో సంపన్న, బీద తేడాలేమీ లేవని తెలిపారు. టీకా అందుబాటులోకి వచ్చినప్పటికీ అమెరికన్లు చాలా జాగ్రత్తగా ఉండాలని గేట్స్ సూచించారు. మాస్క్‌ ధరించడం పెద్ద ఖర్చేమీ కాదని, నిబంధనలు కచ్చితంగా పాటిస్తే ముప్పు నుంచి తప్పించుకోవచ్చని పేర్కొన్నారు.ప్రస్తుతం అమెరికాలో అధికార మార్పిడి జరుగుతున్నందున మహమ్మారిపై పోరు కాస్త సవాల్‌గా మారిందని గేట్స్ అభిప్రాయపడ్డారు. అయితే కొత్త ప్రభుత్వంలో పరిస్థితులు మారొచ్చని ఆశాభావం వ్యక్తం చేశారు. గత కొన్ని రోజులుగా అమెరికాలో రికార్డు స్థాయిలో కొత్త కేసులు, మరణాలు నమోదవుతున్నాయి. నిబంధనలను ప్రజలు నిర్లక్ష్యం చేయడంతో వైరస్‌ తీవ్రమైందని నిపుణులు వెల్లడించారు. అమెరికాలో ఇప్పటివరకు కోటికిపైగా కేసులు బయటపడగా.. దాదాపు 3లక్షల మంది చనిపోయారు.