చెన్నై డిసెంబర్ 31,
తమిళ సూపర్ స్టార్ రజినీకాంత్ రాజకీయాల్లోకి రావడం లేదని చేసిన ప్రకటన రాజకీయంగా అలజడి రేపింది. ఆయన ప్రత్యర్థులు ఈ వార్త విని సంతోషపడగా.. రజినీకాంత్ రాజకీయాల్లోకి రావాలని తపిస్తున్న ఆయన అభిమానులు మాత్రం కలత చెందుతున్నారు. ఈ క్రమంలోనే తమిళనాడు రాష్ట్ర వ్యాప్తంగా అభిమానులు ఇప్పుడు రజినీకాంత్ ఇంటికి తరలివస్తున్నారు. రజినీకాంత్ తన నిర్ణయాన్ని వెనక్కి తీసుకొని వెంటనే రాజకీయాల్లోకి రావాలని కోరుతున్నారు. రాష్ట్రవ్యాప్తంగా ఆయా చోట్ల రజినీకాంత్ రాజకీయాల్లోకి రావాలన్న డిమాండ్ తో నిరసనలు కొనసాగిస్తున్నారు.ఇన్ని రోజులు రజినీకాంత్ చెప్పిందే వేదంగా భావించిన అభిమానులు రజినీకాంత్ ప్రకటన చూసి తట్టుకోలేకపోతున్నారు. ఈ క్రమంలోనే ఆయనపై తాజాగా తిరుగుబాటు చేస్తున్నారు.ఈనెల 31న పార్టీని ప్రకటిస్తానని చెప్పిన రజినీకాంత్ తాజాగా నిన్న పార్టీ పెట్టడం లేదంటూ.. అనారోగ్యమే కారణమని ఫ్యాన్స్ కు షాకిచ్చారు. రజినీ అభిమానులు ఈ నిర్ణయాన్ని జీర్ణించుకోలేకపోతున్నారు.తాజాగా రజినీకాంత్ నిర్ణయానికి వ్యతిరేకంగా తమిళనాడులో ఫ్యాన్స్ ఆందోళనలకు దిగారు. రజినీ రాజకీయాల్లోకి వస్తారని ఎన్నో ఏళ్లుగా ఎదురుచూస్తున్నామని..ఆయన నిర్ణయం తమను ఎంతగానో బాధించిందని అంటున్నారు.