ఏపీలో సంక్రాంతి కోడిపందేలకు సిద్ధమవుతున్నవారికి హైకోర్టు షాకిచ్చింది. సంక్రాంతి సందర్భంగా రాష్ట్రంలో కోడి పందేలు జరగకుండా తగిన చర్యలు తీసుకోవాలని గతంలో తాము ఆదేశాలు ఇచ్చామని.. అవి కచ్చితంగా అమలు చేయాల్సిందేనని అధికారులకు తేల్చి చెప్పింది. కోర్టు ఉత్తర్వులను అధికారులు పాటించలేదని గతంలో దాఖలైన కోర్టు ధిక్కరణ కేసుతో కలిపి ప్రస్తుత పిటిషన్‌ను కూడా కలిపి విచారణ చేస్తామని తెలిపింది. హైకోర్టు న్యాయమూర్తులు జస్టిస్‌ జోయ్‌మల్య బాగ్చీ, జస్టిస్‌ ఏవీ శేషసాయితో కూడిన ధర్మాసనం గురువారం ఈ మేరకు ఆదేశాలిచ్చింది. తదుపరి విచారణను వాయిదా వేసింది.తూర్పుగోదావరి జిల్లాలో సంక్రాంతి సందర్భంగా కోడిపందేలు, బెట్టింగ్‌లను నిలువరించేందుకు అధికారులు చర్యలు తీసుకోవడం లేదని ఆ జిల్లా పెదపూడికి చెందిన షేక్‌ సలీం హైకోర్టులో పిల్‌ దాఖలు చేశారు. ఈ వ్యాజ్యంపై విచారణ జరిపిన ధర్మాసనం.. కోడిపందేలు జరగకుండా చూడాలని కలెక్టర్లను, ఎస్పీలకు 2016లో హైకోర్టు ఆదేశాలు ఇచ్చిన విషయాన్ని గుర్తుచేసింది. ఆ తీర్పును కచ్చితంగా అమలు చేయాలని స్పష్టంచేసింది.