ఏడాది నుంచి కరోనా మహమ్మారి దెబ్బకు విలవిలలాడుతోన్న ప్రపంచానికి టీకాలు వచ్చాయనే ఆనందం అంతలోనే ఆవిరవయ్యింది. టీకా వచ్చేసింది ఇక కరోనా అంతమే తరువాయి అని సంబరపడిపోతుండగా.. తన రూపాన్ని మార్చుకున్న మహమ్మారి మరింత వేగంతో వ్యాపించడం ఆందోళనకు గురిచేస్తోంది. యూకే, దక్షిణాఫ్రికాలో కరోనా వైరస్ కొత్త స్ట్రెయిన్ విజృంభిస్తున్నాయి. యూకే స్ట్రెయిన్ 70 శాతం వేగంగా వ్యాపిస్తున్నట్టు పరిశోధనల్లో తేలింది. దక్షిణాఫ్రికా స్ట్రెయిన్ యూకే కంటే ప్రమాదకారని, దీనికి ప్రస్తుత టీకాలు పనిచేయవని నిపుణులు భావిస్తున్నారు.ఇదిలా ఉండగా.. తాజాగా, అమెరికాలో మరో కొత్తరకం స్ట్రెయిన్‌ గుర్తించిన వైట్‌హౌస్ టాస్క్‌‌ఫోర్స్.. రాష్ట్రాలకు హెచ్చరికలు కూడా చేసిందని అమెరికా మీడియా వెల్లడించింది. జనవరి 3నే కొత్త రకం స్ట్రెయిన్‌పై రాష్ట్రాలను అప్రమత్తం చేసినట్లు పేర్కొంది. ప్రస్తుతం అమెరికాలో రోజువారీ కేసులు రికార్డుస్థాయిలో నమోదవుతున్నాయి. గడచిన 24 గంటల్లో మూడు లక్షలకుపైగా కొత్త కేసులు నమోదయ్యారు. మరణాలు కూడా రికార్డుస్థాయిలో చోటుచేసుకుంటున్నాయి. వసంతకాలం, వేసవి కాలాలతో పోల్చితే కరోనా వ్యాప్తి తీవ్రంగా ఉంది.
మహమ్మారి విజృంభణ చూస్తుంటే.. ఇక్కడ ఉద్భవించిన స్ట్రెయిన్ యూఎస్ రకం అయి ఉండొచ్చు. యూకే స్ట్రెయిన్‌తో పాటుగా ఇది కూడా వ్యాపించింది. దాని వ్యాప్తి 50 శాతం అధికంగా ఉండే అవకాశం ఉంది' అని వైట్‌హౌస్ టాస్క్‌ఫోర్స్‌ హెచ్చరించింది. మాస్క్‌ ధరించడం, భౌతిక దూరం వంటి నిబంధనలను ప్రజలు సక్రమంగా పాటించకపోవడంతో ఈ వైరస్ వేరియంట్ వ్యాప్తి చెంది, అంటువ్యాధులను తీవ్రం చేస్తాయని ఆందోళన వ్యక్తం చేసింది.బ్రిటన్‌లో స్ట్రెయిన్ మాదిరిగానే వైట్‌హౌస్ టాస్క్‌ఫోర్స్ గుర్తించిన యూఎస్ రకం వ్యాప్తి తీరు కూడా ఉందని ఫుండ్ అండ్ డ్రగ్ అడ్మినిస్ట్రేషన్ మాజీ కమిషనర్ మీడియాకు వెల్లడించారు. మరోవైపు, అమెరికాలో 52 యూకే రకం వైరస్‌ కేసులను గుర్తించారు. అయితే దీని వల్ల మరణాల తీవ్రత అధికంగా ఉంటుందనే ఆధారాలు మాత్రం లభించలేదని నిపుణులు అంటున్నారు.మరోవైపు, బ్రిటన్‌లో మహమ్మారి వ్యాప్తి అసాధారణంగా ఉంది. ఆస్పత్రులు, ఐసీయూలు బాధితులతో నిండిపోయాయి. వైరస్ వ్యాప్తి వల్ల ఆరోగ్య వ్యవస్థలు కుప్పకూలిపోయి టీకా పంపిణీకి ప్రమాదం ఏర్పడే అవకాశం ఉందని భావించిన యూకే ప్రభుత్వం కఠినమైన లాక్‌డౌన్‌ను మరోసారి అమలు చేస్తోంది. ఫిబ్రవరి రెండు వారం నాటికి పరిస్థితి కొంత అదుపులోకి వస్తే లాక్‌డౌన్ ఆంక్షలు సడలించనున్నట్టు బ్రిటన్ ప్రధాని బోరిస్ జాన్సన్ ప్రకటించారు.