విజయవాడ, జనవరి 13 
ఏపీ సీఎం రెండో భార్యనంటూ ఓ మహిళ హల్‌చల్ చేసింది. అడ్డుకోబోయిన స్థానికులపై రాళ్లు రువ్వింది. విషయం తెలసుకుని సంఘటన స్థలానికి చేరుకున్న పోలీసులపైనా రుసరుసలాడింది. తాను సీఎం రెండో భార్యనంటూ హంగామా సృష్టించింది. అదీ సీఎం క్యాంప్ ఆఫీస్, నివాసముంటున్న తాడేపల్లిలో. సీఎం ఇంటికి అతి సమీపంలో ఉండే తాడేపల్లి మహానాడులో ఈ షాకింగ్ ఘటన వెలుగుచూసింది. అయితే ఆమెకు మతిస్థిమితం లేదని తెలియడంతో పోలీసులు ఊపిరి పీల్చుకున్నారు.తాడేపల్లి పట్టణ పరిధిలోని కృష్ణా నదీతీరం వెంబడి ఉన్న మహానాడులో మతిస్థిమితం లేని మహిళ పండగపూట హల్‌చల్ చేసింది. తాను సీఎం రెండో భార్యనంటూ బీభత్సం సృష్టించింది. ఆమె మానసిక పరిస్థితి బాగోకపోవడంతో స్థానికులు ఆమెను నియంత్రించేందుకు ప్రయత్నించారు. ఆగ్రహించిన ఆమె వారిపై తిరగబడింది. స్థానికులపై రాళ్ల దాడికి ప్రయత్నించింది. దీంతో స్థానికులు తాడేపల్లి పోలీసులకు సమాచారం అందించారు. సంఘటన స్థలానికి చేరుకున్న పోలీసులు మతిస్థిమితం లేని మహిళను అదుపులోకి తీసుకుని వివరాలు సేకరించారు. చిలకలూరిపేటకి చెందిన ధనలక్ష్మిగా ఆమెను గుర్తించారు. మహానాడుకు చెందిన ఓ వైసీపీ కార్యకర్త ఫిర్యాదు మేరకు పోలీసులు విచారణ జరుపుతున్నారు.