ప్రముఖ సినీ నిర్మాత, వి. దొరస్వామి రాజు బంజారా హిల్స్ కేర్ ఆసుపత్రిలో ఈ రోజు ఉదయం గుండెపోటుతో మరణించారు. వి.ఎం.సి ఆర్గనైజేషన్స్ (విఎంసి ప్రొడక్షన్స్, విఎంసి పిక్చర్స్, విఎంసి ఫిల్మ్స్, విఎంసి 1కంపెనీ, విఎంసి ఫిల్మ్ డిస్ట్రిబ్యూటర్, విఎంసి పిక్చర్ ప్యాలెస్) ఇలా బహుముఖ వ్యాపార సామ్రాజ్యాన్ని సృష్టించిన వ్యవస్థాపకుడు. వి.దొరస్వామి రాజు (విడిఆర్). ఆయన చిత్ర నిర్మాత మాత్రమేకాదు. 1994లో  చిత్తూరు జిల్లా నగిరి నియోజకవర్గం నుంచి పోటీ చేసి, ఆర్.చెంగారెడ్డి వంటి ఉద్దండ నాయకునిపై భారీ మెజారిటీతో గెలుపొందారు. అంతేగాక, టిటిడి బోర్డు సభ్యుడిగా, ఫిల్మ్ ఛాంబర్ అధ్యక్షుడిగా, పంపిణీ మండలి అధ్యక్షుడిగా, ఎగ్జిబిటర్స్ అసోసియేషన్ అధ్యక్షుడిగా  ఇలా పలు కీలకమైన భూమికలను అత్యంత ప్రతిభతో నిర్వహించారు. ఆయన ఆంధ్రప్రదేశ్లో అత్యంత విజయవంతమైన తెలుగు చిత్రనిర్మాత, పంపిణీదారు, ప్రదర్శనకారులలో ఒకడు. ఆయన నిర్మించిన బ్లాక్ బస్టర్ సినిమాలు, అవార్డు సినిమాలు, టెలి సినిమాలు, టెలి సీరియల్స్, తమిళ డబ్బింగ్, హిందీ డబ్బింగ్ చిత్రాలను ఎన్నో నిర్మించారు. సింహాద్రి, అన్నమయ్య, సీతారామయ్య గారి మనవరాలు వంటి గొప్ప చిత్రాలను తెరకెక్కించిన ఘనత వారిది. 1978 లో సొంత సంస్థను ప్రారంభించారు. దీనిని మహానటుడు, పురాణ వ్యక్తిత్వం ఎన్టీ రామారావు చేతులమీదుగా ప్రారంభించారు. అలాగే అక్కినేని నాగేశ్వరరావుతో బ్లాక్ బస్టర్స్ సీతారామయ్య గారి మనవరాలు నిర్మించారు. ఇది ఉత్తమ చిత్రంగా జాతీయ అవార్డును పొందింది. అనేక జాతీయ, అంతర్జాతీయ అవార్డులను పొందింది. ఆయనే నిర్మించిన, అక్కినేని నాగార్జునతో అన్నమయ్య, విపరీతమైన హిట్, చాలా అవార్డులను పొందిందనే విషయం తెలిసిందే.