గుంటూరు జిల్లాలో ఆశా వర్కర్‌ విజయలక్ష్మి కరోనా వ్యాక్సిన్‌ వల్లే చనిపోయిందని ఇంకా నిర్ధారణ కాలేదని రాష్ట్ర ఆరోగ్య శాఖ మంత్రి ఆళ్ల నాని పేర్కొన్నారు. అయితే బాధిత కుటుంబానికి ముఖ్యమంత్రి వైఎస్ జగన్మోహన్ రెడ్డి రూ. 50 లక్షలు ఇవ్వాలని ఆదేశించారని వెల్లడించారు. తాడేపల్లి మండలం పెనుమాకలో ఆశా వర్కర్ బొక్కా విజయలక్ష్మి కుటుంబ సభ్యులను మంత్రి ఆళ్ల నాని, హోం మంత్రి మేకతోటి సుచరిత, ఎమ్మెల్యే ఆళ్ల రామకృష్ణారెడ్డి, ఆరోగ్య శాఖ ప్రిన్సిపల్ సెక్రటరీ కాటంనేని భాస్కర్, జిల్లా అధికారులు సోమవారం పరామర్శించారు. కాగా, గుంటూరులోని తాడేపల్లి మండలం పెనుమాక గ్రామానికి చెందిన ఆశా వర్కర్‌ బొక్కా విజయలక్ష్మి ఈ నెల 19న కరోనా వ్యాక్సిన్‌ వేయించుకున్నారు. తర్వాత అస్వస్థతకు గురై ఆస్పత్రిలో చేరగా, బ్రెయిన్ డెడ్ అయ్యి ఆదివారం మరణించిన విషయం తెలిసిందే.

ఈ తరుణంలో బాధిత కుటుంబాన్ని పరామర్శించిన మంత్రి ఆళ్ల నాని మాట్లాడుతూ.. విజయలక్ష్మి చనిపోవడం దురదృష్టకరమన్నారు. పోస్టుమార్టం రిపోర్టు వస్తే గాని ఆమె మరణానికి సంబంధించిన కారణాలు తెలుస్తాయన్నారు. పోస్టుమార్టం రిపోర్టు త్వరగా వచ్చేందుకు చర్యలు తీసుకుంటామన్నారు. విజయలక్ష్మి మరణానికి కారణాలు ఏమైనా సరే ముఖ్యమంత్రి వైఎస్ జగన్‌మోహన్ రెడ్డి వెంటనే స్పందించారని తెలిపారు. విజయలక్ష్మి కుటుంబానికి అండగా ఉంటామని చెప్పాలని తమను పంపినట్లు పేర్కొన్నారు.విజయలక్ష్మి కుటుంబానికి ప్రభుత్వం అండగా ఉంటుందని, ముఖ్యమంత్రి వైఎస్ జగన్మోహన్ రెడ్డి చెప్పిన మాటలన్నీ కుటుంబ సభ్యులకు వివరించామని తెలిపారు. కుటుంబ సభ్యులు ఒక ఉద్యోగం అడిగారని, అలాగే ఇళ్ల స్థలం, ఇన్సూరెన్స్ కింద వచ్చే రూ. 50 లక్షలు అడిగారని తెలిపారు. అయితే విజయలక్ష్మి మరణానికి 50 లక్షల ఇన్సూరెన్స్ వర్తించదన్నారు. కరోనా విధులు అందించేటప్పుడు మాత్రమే ఇన్సూరెన్స్ వర్తిస్తుందని, వ్యాక్సినేషన్‌కు వర్తించదని తెలిపారు.కానీ, ముఖ్యమంత్రి వైఎస్‌ జగన్‌ మాత్రం.. మానవత్వంతో స్పందించి, ఇన్సూరెన్స్‌తో సంబంధం లేకుండా రాష్ట్ర ప్రభుత్వం తరఫున రూ. 50 లక్షలు ఇస్తామని చెప్పారని మంత్రి ఆళ్ల నాని ప్రకటించారు. ఇప్పటికీ రాష్ట్రవ్యాప్తంగా వ్యాక్సిన్ వేయించుకోవడానికి 3.88 లక్షల మంది రిజిస్ట్రేషన్ చేయించుకున్నారని, ఇప్పటివరకు 1.50 లక్షల మంది కోవిడ్ వ్యాక్సిన్ వేయించుకున్నారని తెలిపారు. ఇప్పటి వరకు 39 మందికి మాత్రమే తల తిరగటం, జలుబు, జ్వరం లాంటి లక్షణాలు కనిపించాయని, రిజిస్ట్రేషన్ చేయించుకున్నంతమాత్రాన వ్యాక్సిన్ వేయించుకోవాలనే అవసరం లేదని స్పష్టం చేశారు. ఏవైనా అనారోగ్య కారణాలు ఉంటే డాక్టర్‌ను సంప్రదించి డాక్టర్ సలహాలు తీసుకుని వ్యాక్సిన్ వేయించుకోవచ్చని సూచించారు