హైదరాబాద్, జనవరి 28 
కోయిలమ్మ సీరియల్ నటుడు అమర్ అలియాస్ సమీర్‌ వివాదం చిక్కుకున్నాడు. తాగిన మైకంలో మణికొండలో ఇద్దరు అమ్మాయిలపై దౌర్జన్యానికి పాల్పడ్డాడనే ఆరోపణపై అమర్‌పై రాయదుర్గం పోలీసులు కేసు నమోదు చేశారు.తమపై అసభ్య పదజాలంతో మాట్లాడుతూ రాత్రివేళ ఇంటికి వచ్చి దౌర్జన్యం చేయడమే కాకుండా తనని లైంగికంగా వేధిస్తున్నాడంటూ రాయదుర్గం పోలీసుల్ని ఆశ్రయించింది శ్రీ విద్య అనే యువతి.అమర్‌తో పాటు ముగ్గురు ఆకతాయిలు.. అమర్ ప్రేయసి స్వాతి తనపై దౌర్జన్యానికి పాల్పడ్డారని ఆరోపించింది శ్రీ విద్య. అమర్, స్వాతిల నుంచి తమకు ప్రాణహాని ఉందంటూ శ్రీవిద్యతో పాటు అపర్ణ అనే మరో యువతి కూడా పోలీసులకు ఫిర్యాదు చేసింది. తమ వద్ద ఐదు లక్షల నగదు తీసుకున్నారని తిరిగి అడిగినందుకు తమపై దౌర్జన్యం చేశారంటూ శ్రీ విద్య, అపర్ణలు ఆరోపిస్తున్నారు.ఇదిలాఉంటే.. అమర్ తాగిన మైకంలో తమపై దౌర్జన్యం చేశాడని శ్రీ విద్య కంప్లైంట్ చేసినప్పటికీ వీరి మధ్య వ్యాపారపరమైన గొడవలు ఉన్నట్టు తెలుస్తోంది. శ్రీ విద్య, స్వాతి, లక్ష్మి ఈ ముగ్గురూ కలిసి మణికొండలో బౌటిక్ వ్యాపారం నిర్వహిస్తున్నారు. అయితే వ్యాపారలావాదేవీల్లో తేడాలు రావడం వల్ల స్వాతి బౌటిక్ వ్యాపారం నుంచి తప్పుకుంది.అయితే తనకు రావాల్సిన వస్తువులు, డబ్బుల విషయంలో పార్టనర్స్ ముగ్గురి మధ్య గొడవలు జరుగుతున్నాయి. స్వాతికి రావాల్సిన బకాయిలు శ్రీవిద్య ఇవ్వకపోవడంతో బుధవారం రాత్రి స్వాతి కోయిలమ్మ సీరియల్ నటుడు అమర్‌తో కలిసి శ్రీ విద్య ఇంటికి వెళ్లి నిలదీశారు. మాటా మాటా పెరిగి గొడవకు దారి తీయడంతో ఈ ఇష్యూ పోలీస్ స్టేషన్ వరకూ వెళ్లింది. అయితే అమర్, స్వాతిలు కూడా కౌంటర్ కేసు పెట్టారు. ఇరువురి ఫిర్యాదులపై కేసులు నమోదు చేసిన రాయదుర్గం పోలీసులు దర్యాప్తు చేపడుతున్నారు.