హైదరాబాద్, జనవరి 28
పోలీసులు ఎంతగా హెచ్చరిస్తున్నా అమ్మాయిలు మాత్రం ఆన్‌లైన్‌లో పరిచయాలు నమ్మి అడ్డంగా మోసపోతున్నారు. ఫేస్‌బుక్, ఇనస్టాగ్రామ్‌లో కొత్త పరిచయాలతో లేనిపోని చిక్కుల్లో పడిపోతున్నారు. అలాంటివారిని నమ్మకండి అని చెబుతున్నా కూడా అడ్డంగా వాటికే బుక్కవుతున్నారు. తాజాగా ఓ మైనర్ బాలిక.. ప్రేమ పేరుతో మోసపోయింది. పెళ్లి చేసుకుంటానని నమ్మించడంతో శారీరకంగా కూడా దగ్గరయ్యింది. ఈ ఘటన హైదరాబాద్ శివారుల్లో జరిగింది. దీంతో బాలికను ప్రేమలోకి దింపి అత్యాచారానికి పాల్పడిన యువకుడిని పోలీసులు అరెస్ట్ చేసి రిమాండ్‌కు తరలించారు. సీఐ శ్రావణ్‌కుమార్‌ కథనం ప్రకారం.. గౌలీపురాకు చెందిన అభిషేక్‌(21) ఫ్యాషన్‌ డిజైనర్‌గా పనిచేస్తున్నాడు‌. తిరుమలగిరి ప్రాంతానికి చెందిన ఓ బాలిక(16) ఇటీవల ఇన్‌స్టాగ్రాంలో పరిచయమైంది. దీంతో వీరిద్దరి మధ్య పరిచయం కాస్త ప్రేమగా మారింది. బాలికకు ఇంట్లో పెళ్లి సంబంధాలు చూస్తున్నారని తెలపడంతో అభిషేక్ ఆమెను గుట్టకు తీసుకువెళ్లాడు. ఈ నెల 24వ తేదీ యాదగిరిగుట్టకు తన ముగ్గురు స్నేహితులతో కలిసి వెళ్లారు.25వ తేదీ ఆమె మెడలో పసుపుతాడు కట్టాడు. ఆమెను తన మాటలతో నమ్మించి 24, 25వ తేదీల్లో బాలికపై అత్యాచారానికి పాల్పడ్డాడు. అనంతరం బాలిక నివాసం వద్ద విడిచిపెట్టి వెళ్లాడు. దీంతో బాలిక తల్లిదండ్రులు పోలీసులకు ఫిర్యాదు చేశారు. నిందితుడిపై అత్యాచారం, పోక్సో చట్టం కింద కేసు నమోదు చేసి రిమాండ్‌కు తరలించారు. అభిషేక్ స్నేహితులను కూడా అదుపులోకి తీసుకొని విచారిస్తున్నారు.