సుప్రీంకోర్టు ప్రధాన న్యాయమూర్తి జస్టిస్ దీపక్‌ మిశ్రాను తొలగించాలని కోరుతూ ప్రతిపక్ష పార్టీలు ఇచ్చిన అభిశంసన తీర్మానం నోటీసును ఉపరాష్ట్రపతి వెంకయ్య నాయుడు సోమవారం ఉదయం తిరస్కరించారు అయితే అభిశంసన తీర్మానం నోటీసును వెంకయ్యనాయడు తిరస్కరించిన అనంతరం సుప్రీంకోర్టు ప్రధాన న్యాయమూర్తి, ఇతర న్యాయమూర్తులు సుదీర్ఘ సమావేశం ఏర్పాటు చేయడం ప్రాధాన్యత సంతరించుకుంది. రోజూ ఉదయం విచారణలు ప్రారంభించేముందు న్యాయమూర్తులు సమావేశమై ఐదు నిమిషాల్లోనే ముగిస్తారు. అయితే ఈ రోజు మాత్రం 20 నిమిషాలు పాటు కొనసాగింది. దీంతో అన్ని ధర్మాసనాలు రోజు కంటే 15 నిమిషాలు ఆలస్యంగా ప్రారంభమయ్యాయి. అభిశంసన నోటీసును తిరస్కరించిన అనంతరం ఉపరాష్ట్రపతి వెంకయ్యనాయుడు మాట్లాడుతూ.. ‘అభిశంసన నోటీసులో పేర్కొన్న ఐదు ఆరోపణలు, అందుకు సంబంధించిన డాక్యుమెంట్లను పరిశీలించాను. సుప్రీంకోర్టు ప్రధాన న్యాయమూర్తి దుష్ప్రవర్తనకు సంబంధించి అవి సరైన, సహేతుకమైన కారణాలు కావని భావిస్తున్నాను.. దీనిపై న్యాయ కోవిదులు, రాజ్యాంగ నిపుణుల సలహా తీసుకున్నాని ఓ దృఢమైన అభిప్రాయానికి వచ్చి, ఈ నోటీసును అనుమతించలేనని’ పేర్కొన్నారు. మూడు రోజుల పాటు దీనిపై విస్తృత సంప్రదింపులు నిర్వహించిన తర్వాత కీలక నిర్ణయం తీసుకున్నారు. మాజీ అటార్నీ జనరల్ కేకే వేణుగోపాల్, న్యాయకోవిదుడు కె.పరాశరన్, లోక్ సభ మాజీ సెక్రటరీ జనరల్ సుభాష్ కశ్యప్, న్యాయశాఖ మాజీ సెక్రటరీ పీకే మల్హోత్రా తదితరుల అభిప్రాయాలను వెంకయ్య తెలుసుకున్నారు. సుప్రీంకోర్టు ప్రధాన న్యాయమూర్తిని అభిశంసిచాలని కోరుతూ కాంగ్రెస్ సహ ఏడు ప్రతిపక్ష పార్టీలు 64 మంది రాజ్యసభ సభ్యుల సంతకాలతో కూడి నోటీసును శుక్రవారం నాడు ఉపరాష్ట్రపతి, రాజ్యసభ ఛైర్మన్ వెంకయ్య నాయుడికి అందజేశారు. ఐదు కేసుల్లో చీఫ్ జస్టిస్ దీపక్ మిశ్రా వైఖరిని తప్పుబడుతూ నోటీసుల్లో పేర్కొన్నారు. నోటీసులో పేర్కొన్న ఐదు అభియోగాలు: ఒడిశాలోని ప్రసాద్‌ ఎడ్యుకేషన్‌ ట్రస్ట్‌ కేసులో లంచాలు పుచ్చుకుని, ఇదే వ్యవహారంలో హైకోర్టు మాజీ న్యాయమూర్తిపై విచారణకు అంగీకరించలేదని ఆరోపించారు. ప్రసాద్‌ ఎడ్యుకేషన్‌ ట్రస్ట్‌ కేసు సుప్రీం కోర్టు ముందుకొచ్చినప్పుడు ఒకవైపు పరిపాలనాధికారాలు, మరోవైపు న్యాయపరమైన అధికారాలను ప్రయోగించినట్టు ఆరోపణలు. ఈ కేసు లిస్టింగ్‌ అంశంపై జస్టిస్‌ చలమేశ్వర్‌ ధర్మాసనం విచారణ మొదలుపెట్టినప్పుడు పాత తేదీలతో కూడిన నోట్‌ను రిజిస్ట్రీ ద్వారా న్యాయమూర్తుల ముందుంచారనేది ప్రధాన ఆరోపణ. తన భూములకు సంబంధించి తప్పుడు అఫిడవిట్‌ దాఖలుచేశారని నోటీసులో పేర్కొన్నారు. సున్నితమైన కేసుల్లో ఫలితాలను ప్రభావితం చేయడానికి కొన్ని నిర్దిష్ట ధర్మాసనాలకు మాత్రమే వాటి విచారణ బాధ్యతను అప్పగించారంటూ అందులో తెలిపారు.