ఉప్పెన పై పాజిటివ్ టాక్...
హైదరాబాద్, ఫిబ్రవరి 12, 
మెగా హీరో వైష్ణవ్ తేజ్ కథానాయకుడిగా పరిచయం అవుతున్న చిత్రం ‘ఉప్పెన’. సుకుమార్ రైటింగ్స్‌లో.. ఆయన శిష్యుడు బుచ్చిబాబు తెరకెక్కించిన ఈ సినిమాపై అంచనాలు కూడా భారీగానే ఉన్నాయి. మెగాస్టార్ మేనల్లుడు, సాయి ధరమ్ తేజ్ తమ్ముడి తొలి సినిమా కావడంతో.. వైష్ణవ్ తేజ్ సినిమా కోసం మెగా అభిమానులు ఎంతో ఆసక్తిగా ఎదురుచూస్తున్నారు. ఇక పవర్ స్టార్ పవన్ కళ్యాణ్ ప్రశంసలు కూడా ఈ చిత్రానికి దక్కడంతో పాజిటివ్ వైబ్స్‌తో ఈ చిత్రం నేడు (ఫిబ్రవరి 12) థియేటర్స్‌లో విడుదలైంది. ప్రతినాయకుడిగా నటించిన విజయ్ సేతుపతి సినిమాకి మరింత హైప్ తీసుకుని రాగా.. హీరోయిన్ కృతి శెట్టి ఎక్స్‌ప్రెషన్స్ కూడా సినిమాకు ప్రధానమైన బలంగా మారాయి. ఆమె క్యూట్ లుక్స్, పెర్ఫామెన్స్ యూత్‌ని మైమరపించేట్టుగానే టీజర్, ట్రైలర్, సాంగ్స్‌లో కనిపించాయి.భారీ అంచనాలతో థియేటర్స్‌లోకి వచ్చిన ‘ఉప్పెన’.. బాక్సాఫీస్ వద్ద ఉప్పెన లాంటి కలెక్షన్లు రాబట్టడం ఖాయంగానే కనిపిస్తోంది. తొలిరోజు బుకింగ్స్ అన్నీ హౌస్‌ఫుల్ కావడంతో పాటు యూఎస్ ప్రీమియర్ షోస్ అన్నీ ఫుల్ అయ్యాయి. ఇక చాలాచోట్ల ఈ సినిమా బెనిఫిట్ షోస్ పడటంతో ట్విట్టర్ వేదికగా స్పందనలు తెలియజేస్తున్నారు. ఇక చిత్ర నిర్మాణ సంస్థ మైత్రీ మూవీ మేకర్స్, మ్యూజిక్ డైరెక్టర్ దేవిశ్రీ ప్రసాద్, ఇతర సెలబ్రిటీలు ఈ చిత్ర విజయంపై ధీమా వ్యక్తం చేస్తూ ట్వీట్లు చేశారు. మరి ‘ఉప్పెన’ చిత్రంపై ట్విట్టర్ రెస్పాన్స్ ఎలా ఉందో చూద్దాం.
బెటర్ ఫస్టాఫ్:
హీరోహీరోయిన్ల మధ్య సాగే సన్నివేశాలు చాలా బాగా వచ్చాయని అంటున్నారు. వైష్ణవ్ తేజ్, కృతి శెట్టి పోటీపడి నటించినట్లు ట్విట్టర్ రిపోర్ట్స్ చెబుతున్నాయి. ఫస్టాఫ్‌లో వచ్చే మూడు పాటలు చాలా బ్యూటిఫుల్‌గా తెరకెక్కించారట. విజువల్స్, డైరెక్షన్ పార్ట్ అన్నీ హైలైట్ అని టాక్ వచ్చింది.ఉప్పెన క్లైమాక్స్ సీన్ కన్నీళ్లు తెప్పిస్తోందని, సినిమా సూపర్ డూపర్ హిట్ పక్కా అంటున్నారు. సినిమాను చూసిన వారంతా క్లైమాక్స్ గురించి ప్రత్యేకంగా చెప్పుకుంటున్నారు. ఇది తెలుగు ప్రేక్షకులకు కొత్తగా అనిపిస్తుందని అంటున్నారు. విజయ్ సేతుపతి నటనకు, బుచ్చిబాబు దర్శకత్వ ప్రతిభకు ప్రశంసలు దక్కుతున్నాయి. ఇంకొందరు మాత్రం ఈ క్లైమాక్స్ సీన్ ఉహించినంత స్థాయిలో ఆకట్టుకోలేదని చెబుతున్నారు. క్లైమాక్స్‌లో హీరో మర్మాంగాన్ని విజయ్ సేతుపతి కట్ చేయడం ఇప్పుడు ట్విట్టర్‌లో హాట్ టాపిక్ అయ్యింది.