మరణశిక్ష విధించడం వల్ల అత్యాచారాలు ఆగుతాయా అని ఢిల్లీ హైకోర్టు ప్రశ్నించింది. ఈ ఆర్డినెన్స్‌ ను ఏదో హడావిడిగా తెచ్చారని సామాజిక కార్యకర్తలు, బాధితుల తల్లిదండ్రులు వ్యాఖ్యానిస్తూంటే- మరణశిక్ష విధించడం వల్ల అత్యాచారాలు ఆగుతాయా అన్న అంశంపై పూర్తి పరిశీలన జరిపారా..హైకోర్టు ప్రశ్నించింది.ఆర్డినెన్స్‌కు ముందు శాస్త్రీయ అధ్యయనం చేశారా, రేప్‌కూ, హత్యకూ ఒకటే శిక్ష అయినపుడు- అత్యాచారం చేశాక ఆ రేపిస్టు ఆ బాధితురాల్ని బతకనిస్తాడా అని జస్టిస్‌ గీతా మిట్టల్‌, జస్టిస్‌ హరిశంకర్‌లతో కూడిన బెంచ్‌ ప్రశ్నించింది. రేపిస్టులకు ఏడేళ్ల జైలు శిక్ష విధించవచ్చన్న-2013 నాటి క్రిమినల్‌ ప్రొసీజర్‌ కోడ్‌ చట్ట సవరణను సవాల్‌ చేస్తూ దాఖలైన ఓ పాత ప్రజాహిత దావా విచారణ సమయంలో బెంచ్‌ ఈ ప్రశ్నలు వేసింది. ఇవే ప్రశ్నల్ని సామాజికవేత్తలు, మాజీ జడ్జీలు సైతం వేస్తున్నారు.దీనితో పన్నెండేళ్లలోపు బాలికలపై అత్యాచారం చేస్తే ఉరిశిక్ష విధించవచ్చన్న కేంద్ర ఆర్డినెన్స్‌ తీవ్ర చర్చకు దారితీసింది. హత్యకు, రేప్‌కూ శిక్ష ఒకటే అని తెలిశాక- చాలా మంది నేరగాళ్లు- సాక్ష్యం లేకుండా చేయడానికి - బాధితురాల్ని చంపేస్తారు. అత్యాచారం ఒక నరకమైతే, పుట్టిన బిడ్డను శాశ్వతంగా కోల్పోవడం మరీ దుర్భరం. ఈ ఆర్డినెన్స్‌ అలాంటి పరిస్థితికి తావివ్వరాదని అత్యాచారానికి గురైన ఓ బాలిక తల్లి పేర్కొంది. దీనివల్ల పిల్లలపై విపరీత పరిణామాలుంటాయి. ఇలాంటివి రేప్‌లను ఆపలేవఅని ఢిల్లీ హైకోర్టు మాజీ జడ్జి జస్టిస్‌ ఏపీ షా అన్నారు.