హైదరాబాద్, ఫిబ్రవరి 26, 
తెలంగాణలో ఉద్యోగాల కల్పనపై విపక్షాలు చేస్తున్న విమర్శలకు మంత్రి కేటీఆర్ స్ట్రాంగ్ కౌంటరిచ్చారు. ప్రతిపక్షాలు అసత్య ప్రచారం చేస్తూ యువతను పక్కదోవ పట్టిస్తున్నాయంటూ తీవ్రస్థాయిలో మండిపడ్డారు. తాము అధికారంలోకి వచ్చిన తర్వాత లక్షా 32 వేలకు పైగా ఉద్యోగాలు కల్పించామని.. కావాలంటే ఆయా శాఖలకు వెళ్లి ధ్రువీకరించుకోవాలంటూ సవాల్ చేశారు. కేవలం యువతను గందరగోళం చేయడానికే ప్రతిపక్షాలు కొత్త నాటకానికి తెరతీశాయని ఆయన విమర్శించారు.ఉద్యోగాల భర్తీ విషయంలో కాంగ్రెస్, బీజేపీలు జూఠ మాటలు మాట్లాడుతున్నాయంటూ కేటీఆర్ మండిపడ్డారు. 2014 నుంచి ఇప్పటి వరకూ వివిధ శాఖలలో 1,32,899 ఉద్యోగాలను భర్తీ చేశామన్న ఆయన.. నిజాలను జీర్ణించుకోలేని ప్రతిపక్ష నేతలు అసత్యాలు చెబుతున్నాయన్నారు. సీనియర్ నేత జానా రెడ్డి కూడా అందులో భాగం కావడం బాధాకరమని కేటీఆర్ వ్యాఖ్యానించారు. తమ పదేళ్ల కాంగ్రెస్ పాలనలో ఎన్ని ఉద్యోగాలిచ్చామో చెబుతామని జానారెడ్డి అన్నారని.. అందులో తెలంగాణ వారికి ఎన్ని ఉద్యోగాలిచ్చారో చెప్పాలని కేటీఆర్ నిలదీశారు.
ఉద్యోగాల భర్తీ నిరంతర ప్రక్రియని కేటీఆర్ తెలిపారు. మరో 50 వేల ఉద్యోగాలను భర్తీ చేసేందుకు సీఎం కేసీఆర్ నిర్ణయం తీసుకున్నారని.. ఎన్నికల కోడ్ ముగిసిన వెంటనే నియామకాల ప్రక్రియ మొదలవుతుందని మంత్రి తెలిపారు. అందులో ఎవరికీ ఎలాంటి సందేహం అక్కర్లేదని ఆయన స్పష్టం చేశారు. నిజం చెప్పులేసుకునే లోపు అబద్ధం ఊరంతా తిరిగొస్తుందన్నట్టు ప్రతిపక్షాలు వ్యవహరిస్తున్నాయంటూ సెటైర్లు వేశారు.
కేటీఆర్ విడుదల చేసిన లేఖలో ఉద్యోగాల వివరాలు..
1. తెలంగాణ స్టేట్ పబ్లిక్ సర్వీస్ కమిషన్ - 30,594
2. తెలంగాణ స్టేట్ లెవెల్ పోలీస్ రిక్రూట్‌మెంట్ బోర్డ్ - 31,972
3. తెలంగాణ స్టేట్ రెసిడెన్షియల్ ఎడ్యుకేషనల్ ఇన్‌స్టిట్యూషన్స్ రిక్రూట్‌మెంట్ బోర్డు- 3,623
4. ప్రొఫెసర్ జయశంకర్ తెలంగాణ స్టేట్ అగ్రికల్చరల్ యూనివర్సిటీ - హైదరాబాద్ - 179
5. శ్రీ కొండా లక్ష్మణ్ బాపూజీ తెలంగాణ స్టేట్ హార్టికల్చర్ యూనివర్సిటీ - హైదరాబాద్- 80
6. డైరెక్టర్, మైనారిటీస్ వెల్ఫేర్ - 66
7. జూనియర్ పంచాయతీ సెక్రటరీస్ - 9,355
8. డిపార్ట్మెంట్ ఆఫ్ ఆయుష్ - 171
9. టీఎస్ జెన్ కో- 856
10. టీఎస్ ఎన్పీడీసీఎల్ - 164
11. టీఎస్ ఎస్పీడీసీఎల్ - 201
12. టీఎస్ ట్రాన్స్ కో - 206
13. టీఎస్-ఆర్టీసీ- 4,768
14. సింగరేణి కాలరీస్ కంపెనీ లిమిటెడ్-12,500
15. జెన్కో, ట్రాన్స్ కో, ఎన్పీడీసీఎల్, ఎస్పీడీసీఎల్ - 6,648
16. విద్యుత్ శాఖలో కాంట్రాక్ట్ ఉద్యోగుల క్రమబద్ధీకరణ - 22,637
17. హైదరాబాద్ జలమండలి- 807
18. తెలంగాణ స్టేట్ కో-ఆపరేటివ్ అపెక్స్ బ్యాంక్ - 243
19. డీసీసీబీలు - 1,571
20. భర్తీ ప్రక్రియ తుదిదశలో ఉన్న ఉద్యోగాలు - 6,258
మొత్తం ఉద్యోగాల సంఖ్య - 1,32,899