తాజ్ కు బాంబు బెదిరింపు
ఆగ్రా, మార్చి 4, 
తాజ్‌‌మహల్‌ వద్ద బాంబు పెట్టినట్టు గురువారం ఉదయం పోలీసులకు గుర్తుతెలియని వ్యక్తుల నుంచి ఫోన్‌ వచ్చింది. దీంతో అప్రమత్తమైన పోలీసులు అక్కడికి చేరుకుని తనిఖీలు చేపట్టారు. ముందు జాగ్రత్త చర్యల్లో భాగంగా తాజ్‌‌మహల్‌ను తాత్కాలికంగా మూసివేశారు. లోపలి పర్యాటకులను బయటకు పంపి గాలింపు చర్యలు ప్రారంభించారు. బాంబ్‌, డాగ్‌ స్క్వాడ్‌ను రంగంలోకి దింపి విస్తృతంగా తనిఖీలు నిర్వహిస్తున్నారు. బాంబు బెదిరింపు నేపథ్యంలో తాజ్‌ మహల్‌ పరిసర ప్రాంతాల్లో భద్రతను కట్టుదిట్టం చేశారు.రెండు ద్వారాలను మూసివేసిన అధికారులు.. సీఐఎస్ఎఫ్, స్థానిక పోలీసుల సాయంతో క్షుణ్ణంగా పరిశీలిస్తున్నారు. ఫోన్ ఎవరు చేశారు? ఎక్కడ నుంచి వచ్చిందని? పోలీసులు ఆరాతీస్తున్నారు. ఈ ఫోన్ కాల్ ఫిరోజాబాద్ వ్యక్తి నుంచి ఫోన్ వచ్చినట్టు గుర్తించారు. పోలీస్ హెల్ప్‌లైన్‌కు ఓ వ్యక్తి ఫోన్ చేసి చెప్పాడని, బాంబు బెదిరింపు కాల్‌పై దర్యాప్తు కొనసాగుతుందని ఆగ్రా ఎస్పీ శివరామ్ యాదవ్ తెలిపారు. తాజ్ పరిసర ప్రాంతాల్లో భద్రతను కట్టుదిట్టం చేశామని అన్నారు. తాజ్ మహల్ వద్ద బాంబు ఉందని, కొద్ది సేపట్లో అది పేలుతుందని ఆగంతకుడు ఫోన్ చేశాడని పేర్కొన్నారు.సైనిక నియామకాల్లో వివక్షకు గురైనందునే బాంబు పెట్టినట్టు ఆగంతకుడు అన్నాడని ఎస్పీ వివరించారు. బెదిరింపు ఫోన్ కాల్‌తో 1,000 మందికిపైగా సందర్శకులను ఖాళీచేయించినట్టు ఆగ్రా జోన్ ఏడీజీ రాజీవ్ కృష్ణ తెలిపారు. ఇప్పటి వరకూ ఎటువంటి పేలుడు పదార్థాలు లభ్యంకాలేదని ఆయన అన్నారు. ఇక, కరోనా వైరస్ కారణంగా గతేడాది మార్చి 17 నుంచి ఆరు నెలల పాటు తాజ్‌మహల్‌ను యూపీ ప్రభుత్వం మూసివేసింది. తిరిగి సెప్టెంబరులో తెరిచి, సందర్శకులను అనుమతిస్తున్నారు.