కాస్టింగ్ కౌచ్... టాలీవుడ్‌ను షేక్ చేసిన ఈ వ్యవహారం... ఇప్పుడు బాలీవుడ్‌తో పాటూ జాతీయ స్థాయిలోనూ హాట్‌టాపిక్ అవుతోంది. కొరియోగ్రాఫర్ సరోజ్‌ఖాన్ వ్యాఖ్యలతో ఈ అంశం రాజకీయాలవైపు మళ్లింది. తాజాగా దీనిపై కాంగ్రెస్ మాజీ ఎంపీ రేణుకా చౌదరి స్పందించారు. కాస్టింగ్ కౌచ్ సినిమాల్లో మాత్రమే కాదు... అన్ని చోట్లా ఉందని... ఇందుకు పార్లమెంట్‌ కూడా ఏమీ మినహాయింపు కాదంటూ సంచలన వ్యాఖ్యలు చేశారు. దీనిపై దేశమంతా ఒక్కటై పోరాడాలని పిలుపునిచ్చారు. కాస్టింగ్ కౌచ్‌పై బాలీవుడ్ కొరియోగ్రాఫర్ సరోజ్‌ఖాన్ చేసిన వ్యాఖ్యలను మీడియా ప్రస్తావించగా... రేణుకా చౌదరి స్పందించారు. ఇవాళ బాలీవుడ్ కొరియాగ్రాఫర్ సరోజ్‌ఖాన్ కాస్టింగ్ కౌచ్‌పై స్పందించారు. అంతేకాదు ఈ వ్యవహారం ఇప్పుడు కొత్తగా రాలేదని.. బాబా అజం కాలం నుంచి ఉందన్నారు. కనిపించిన ప్రతి మహిళను ఎవరో ఒకడు తాకాలనే చూస్తాడన్నారు. ఇండస్ట్రీ వాడుకొని వదిలేయడం లేదన్నారు. ఈ వ్యాఖ్యలపై దుమారం రేగడంతో ఆమె క్షమాపణలు చెప్పారు.