న్యూయార్క్, మార్చి 13, 
గతేడాది మినియాపొలీస్‌లో ఖాకీల కర్కశత్వానికి బలైపోయిన జార్జ్ ఫ్లాయిడ్ ఘటన అగ్రరాజ్యం అమెరికాను కుదిపేసింది. జాత్యాంహకారాన్ని నిరసిస్తూ పెద్ద ఎత్తున జనం వీధుల్లోకి వచ్చి ఆందోళనలు చేశారు. ఈ ఘటనకు వ్యతిరేకంగా ఐరోపా దేశాల్లోనూ నిరసనలు మిన్నంటాయి. ఇదిలా ఉండగా, జార్జ్ ఫ్లాయిడ్ కుటుంబానికి స్థానిక అధికారులు 27 మిలియన్ డాలర్లు (దాదాపు రూ.196కోట్లు) నష్టపరిహారంగా చెల్లించడానికి ముందుకొచ్చారు. ఈ విషయాన్ని మిన్నెసోటా లాయర్లు ఫ్లాయిడ్ కుటుంబ సభ్యులకు శుక్రవారం తెలియజేశారు.అన్యాయంగా ఫ్లాయిడ్‌ను పోలీసులు పొట్టనబెట్టుకున్నారని, ఇది వారికి తగిన గుణపాఠమని ఈ సందర్భంగా అతడి కుటుంబ సభ్యులు పేర్కొన్నారు. కాగా, పౌర హక్కులకు సంబంధించి మరణాల కేసుల విషయంలో అమెరికా చరిత్రలోనే ఇది అతిపెద్ద ప్రీ-ట్రయల్ సెటిల్మెంట్ అని న్యాయవాదులు వ్యాఖ్యానించారు. ఈ ఘటనకు బాధ్యుడైన పోలీస్ ఆఫీసర్ డెరక్ చావిన్‌పై హత్య కేసు నమోదయ్యింది.మినియాపొలీస్ పోలీస్ అధికారి గతేడాది మే 25న ఫ్లాయిడ్‌ను అదుపులోకి తీసుకునే క్రమంలో క్రూరంగా ప్రవర్తించిన విషయం తెలిసిందే. ఫ్లాయిడ్‌ను కిందపడేసి అతడి మెడపై డెరక్ తన మోకాలితో చాలాసేపు అదిమి పట్టడంతో విలవిలలాడిపోయాడు. తనకు ఊపిరి ఆడటంలేదని, వదలిపెట్టాలని ఫ్లాయిడ్ వేడుకున్నా డెరెక్ జాలిచూపలేదు. అనంతరం ఫ్లాయిడ్‌ను ఆస్పత్రికి తరలించినా అప్పటికే అతడు చనిపోయినట్టు నిర్ధారించారు. ఈ ఘటనను మొత్తం అటువైపుగా వెళ్తున్నవారు వీడియో తీసి ఇంటర్నెట్‌లో షేర్ చేయడంతో వైరల్ అయ్యింది.ఈ ఘటనపై అమెరికా పౌరులు భగ్గమన్నారు. కొన్ని ప్రాంతాల్లో అల్లర్లకు దారితీయడంతో సైన్యం రంగంలోకి దిగింది. దీంతో డెరెక్‌ సహా మరో ఇద్దరు పోలీస్ సిబ్బందిపై ఉన్నతాధికారులు చర్యలు తీసుకున్నారు. ఫ్లాయిడ్ మృతిపై అతడి కుటుంబసభ్యులు కోర్టును ఆశ్రయించి, పౌర హక్కుల దావా వేశారు. మినియాపోలిస్‌ పరిపాలన విభాగం సహా ముగ్గురు పోలీస్ అధికారులను నిందితులుగా పేర్కొన్నారు.న్యాయపోరాటంతో మిన్నియాపోలీస్ అధికార యంత్రాంగం దిగివచ్చింది. న్యాయస్థానం వెలుపల పరిష్కారం చేసుకునే దిశగా ఫ్లాయిడ్ కుటుంబాన్ని ఒప్పించింది. ఇందులో భాగంగా రూ.196కోట్ల నష్టపరిహారం చెల్లించేందుకు అంగీకరించింది. ఈ ఒప్పందంపై ఫ్లాయిడ్ సోదరుడు రోడ్నీ స్పందించారు. ఇకపై నల్లజాతీయులపై తెల్లజాతీయుల దౌర్జన్యానికి దిగాలంటే కొంచెం ఆలోచిస్తారని ఆయన అన్నారు.అలాగే తప్పుడు మరణానికి తగిన న్యాయం జరిగిందని ఫ్లాయిడ్ ఫ్యామిలీ లాయర్ బెన్ క్రంప్ పేర్కొన్నారు. ఇది అగ్రరాజ్యం చరిత్రలోనే అతిపెద్ద ప్రీ-ట్రయల్ సెటిల్మెంట్ అని ఆయన తెలిపారు.‘ప్రపంచవ్యాప్తంగా మిలియన్ల మంది ప్రజలు సాక్ష్యమిచ్చిన జార్జ్ ఫ్లాయిడ్ భయంకర మరణం, న్యాయం, మార్పు కోసం బలమైన కోరిక, తోసిపుచ్చలేని డిమాండ్ తెచ్చిపెట్టింది’ అని ఫ్లాయిడ్ కుటుంబ న్యాయవాది బెన్ క్రంప్ అన్నారు. ‘ఒక తప్పుడు మరణ కేసులో అతిపెద్ద ప్రీ-ట్రయల్ పరిష్కారం.. ఒక నల్లజాతియుడి జీవితం సాక్ష్యంగా ఉంటుంది.. నల్లజాతీయులపై పోలీసుల క్రూరత్వం అంతం కావాలి అనే శక్తివంతమైన సందేశాన్ని పంపుతుంది’ అని క్రంప్ చెప్పారు