హైదరాబాద్, మార్చి 15, 
కలెక్షన్ కింగ్మోహన్ బాబు, మెగాస్టార్ చిరంజీవి ఈ ఇద్దరి సినీ చరిత్ర గురించి ప్రతి ఒక్క తెలుగు ప్రేక్షకుడికీ తెలుసు. ఎన్నో సినిమాల్లో కలిసి తెర పంచుకున్న వీరి మధ్య ఉన్న స్నేహం గురించి ప్రత్యేకమైన వివరణ అవసరమే లేదు. సీనియర్ నటులుగా స్నేహబంధం కొనసాగిస్తూనే ఒకరిపై మరొకరు మాటలతూటాలు పేల్చుకుంటూ సంచలనం అవుతుండటం వీరి నైజం. టాలీవుడ్ టామ్ అండ్ జెర్రీగా పిలుచుకునే ఈ జోడీ సీక్రెట్‌గా సిక్కిం టూర్ వేశారు. తాజాగా ఈ మ్యాటర్ రివీల్ చేస్తూ మంచు లక్ష్మి ఒక రకంగా రియాక్ట్ కాగా.. మంచు మనోజ్ మరో రకంగా రియాక్ట్ అయ్యారు.వందల కొద్ది సినిమాలు చేసి నాలుగు దశాబ్దాలుగా సినీ ప్రస్థానం కొనసాగిస్తున్నారు మోహన్ బాబు, చిరంజీవి. నిజానికి ఈ ఇద్దరూ మొదటినుంచీ మంచి స్నేహితులే అయినా ఒకానొక సమయంలో వాళ్ల మధ్య విభేదాలు తలెత్తాయని, ఈ వైరం వల్ల ఇండస్ట్రీలో సమస్యలు వచ్చాయనే వార్తలు షికారు చేశాయి. అయితే కొన్ని సందర్భాల్లో ఈ ఇద్దరూ ఎదురుపడ్డప్పుడు అదే సీన్ రిఫ్లెక్ట్ అయినప్పటీకీ.. తామిద్దరం ఎప్పుడు కలుసుకున్నా ఒకరిపై ఒకరు ఛలోక్తులు విసురుకునేందుకు ప్రాధాన్యత ఇస్తామే తప్ప, తమ మధ్య ఎటువంటి విభేదాల్లేవని క్లారిటీ ఇచ్చారు మోహన్ బాబు.ఇక ఈ మధ్యకాలంలో తరుచూ కలుసుకుంటూ వార్తల్లో నిలుస్తున్న ఈ లెజెండ్స్.. తాజాగా ఓ సీక్రెట్ టూర్ వేశారు. ఈ విషయాన్ని బయటపెడుతూ చిరంజీవి- మోహన్ బాబు కలిసి దిగిన పిక్ షేర్ చేశారు మంచు లక్ష్మి. ఈ మేరకు వీళ్లిద్దరూ సిక్కిం టూర్‌ వేశారనే విషయాన్ని తెలుపుతూ.. ఇద్దరు మాస్ట్రోలు ఒకేచోట కలిస్తే ఫైరే అని కామెంట్ చేశారు. ఈ వీకెండ్ టూర్‌ కోసం నాన్నను ఒప్పించిన ఘనత మీకే దక్కుతుంది చిరు అంకుల్. మీరిద్దరూ కలిసి ఎంజాయ్ చేస్తున్నందుకు నాకు అసూయగా ఉంది. త్వరలోనే అందరం కలిసి టూర్ వేద్దాం అని మంచు లక్ష్మి పేర్కొన్నారు.