హీరో మంచు విష్ణుకు పెద్ద ప్రమాదమే తప్పింది. ‘ఆచారీ అమెరికా యాత్ర’ సినిమాలో బైక్ ఛేజింగ్ సీన్లో ఆయన అదుపు తప్పి బైకు మీద నుంచి పడిపోయారు. స్టంట్‌లో భాగంగా ఆయన హెల్మెట్ తీసి.. బైక్ ఫాలో అవుతున్న రౌడీలను కొట్టాలి. అయితే, సరిగ్గా హెల్మెట్ తీసి వెనుక ఉన్న బైకర్‌ను కొట్టగానే ఆ బైకు.. మంచు విష్ణు నడుపుతున్న బైకును ఢీకొంది. దీంతో విష్ణు బైకు అదుపుతప్పింది. విష్ణుతోపాటు బైకు వెనుక కూర్చున్న ప్రగ్యా జైశ్వాల్ కూడా రోడ్డు మీద పడిపోయారు. ఆ వేగంలో విష్ణు తల రోడ్డును బలంగా ఢీకొనేదే. కానీ, ఆయన భుజాలపైకి పడటంతో తల నెలకి తగలలేదు. దీంతో అంతా ఊపిరి పీల్చుకున్నారు. ఈ ఘటనలో విష్ణుకు తీవ్ర గాయాలయ్యాయి. ప్రగ్యాకు హెల్మెట్ ఉండటంతో స్వల్ప గాయాలతో బయటపడింది. మంచు విష్ణు తన ట్విట్టర్, యూట్యూబ్ చానెల్ ద్వారా ఆ వీడియోను పోస్టు చేశారు. ‘‘స్టంట్స్ ఎప్పుడూ సేఫ్ కాదు. ఈ ఘటనలో నా తల పగిలిపోయేదే’ అని ట్వీట్ చేశారు. ఇప్పుడా వీడియో సోషల్ మీడియాలో వైరల్‌‌గా మారింది.