హైదరాబాద్, మార్చి 17, 
అనంతపురం మాజీ ఎంపీ జేసీ దివాకర్ రెడ్డి చేసిన వ్యాఖ్యలు తెలంగాణ కాంగ్రెస్‌లో పెనుదుమారం రేపాయి. తెలంగాణ రాష్ట్రం ఇచ్చి సోనియా గాంధీ పెద్ద తప్పు చేసిందని.. అక్కడాఇక్కడా లేకుండా పోయిందని నిన్న జేసీ షాకింగ్ కామెంట్స్ చేశారు. టీకాంగ్రెస్ నేతలు ఏడుస్తూ కూర్చుంటే లాభం లేదన్న జేసీ.. వేరే దారి చూసుకోవాలంటూ ఉచిత సలహా కూడా ఇచ్చారు. అంతటితో ఆగని ఆయన నాగార్జున సాగర్ ఉప ఎన్నికపై సంచలన వ్యాఖ్యలు చేశారు. మంత్రివర్గంలో తన సహచరుడు, సీనియర్ నేత జానారెడ్డి సాగర్‌లో గెలవలేడండూ జేసీ చేసిన వ్యాఖ్యలపై కాంగ్రెస్ నేతలు ఓ రేంజ్‌లో మండిపడుతున్నారు.జేసీ దివాకర్ రెడ్డి వ్యాఖ్యలపై తెలంగాణ కాంగ్రెస్ సీనియర్ నేత వీహెచ్(వీ హనుమంతరావు) తీవ్రస్థాయిలో ఫైర్ అయ్యారు. సీఎల్పీలో కూర్చుని సోనియా గాంధీ, రాహుల్ గాంధీపై అనుచిత వ్యాఖ్యలు చేశారంటూ ఆయన ఆగ్రహం వ్యక్తం చేశారు. జేసీ దివాకర్ రెడ్డి తన రాజకీయాలు ఆంధ్రాలో చూసుకోవాలంటూ కౌంటరిచ్చారు. నాగార్జున సాగర్ ఉప ఎన్నికలో జానా రెడ్డి ఓడిపోతాడని చెప్పడానికి జేసీ ఎవడంటూ ఘాటు వ్యాఖ్యలు చేశారు. ఆయన జోతిష్యాలు చెప్పడం మానుకోవాలని హితవు పలికారు.జేసీ వ్యాఖ్యలపై ఓ రేంజ్‌లో ఫైర్ అయిన వీహెచ్.. ఆయన తన రాజకీయాలు జగన్‌పై చూపించుకోవాలన్నారు. జేసీకి దమ్ముంటే అనంతపురంలో.. రాయలసీమలో తన బలం చూపించుకోవాలంటూ స్ట్రాంగ్ వార్నింగ్ ఇచ్చారు. జేసీ దివాకర్ రెడ్డి వ్యవహారం చూస్తే కేసీఆర్ కోవర్ట్ అని అర్థమవుతోందని వీహెచ్ అన్నారు. సీఎల్పీలో కాంగ్రెస్ అధినేత్రి సోనియా, రాహుల్‌పై విమర్శలు చేయడాన్ని ఆయన తీవ్రంగా తప్పుబట్టారు.
అనంతపురం జిల్లా తాడిపత్రికి చెందిన జేసీ దివాకర్ రెడ్డి సుదీర్ఘ కాలం కాంగ్రెస్‌లో కొనసాగారు. ఉమ్మడి ఆంధ్రప్రదేశ్‌లో మంత్రిగా పనిచేశారు. వైఎస్ క్యాబినెట్‌లో జానారెడ్డితో కలిసి పని చేశారు. రాష్ట్ర విభజనానంతరం ఆయన టీడీపీలో చేరారు. 2014 ఎన్నికల్లో అనంతపురం ఎంపీగా గెలిచారు. గత ఎన్నికల్లో తన కుమారుడిని బరిలోకి దింపి ఓటమి చవిచూశారు. దశాబ్దాలపాటు కాంగ్రెస్ పార్టీలో కొనసాగిన జేసీ దివాకర్ రెడ్డి.. తెలంగాణ కాంగ్రెస్‌పై వ్యాఖ్యలు చేయడం హాట్‌టాపిక్‌గా మారింది.