న్యూఢిల్లీ, మార్చి 17, 
కాలుష్య దేశాల్లో భారత్‌ ప్రపంచంలో మూడో స్థానంలో నిలిచింది. అంతేకాదు, ప్రపంచంలో కాలుష్య రాజధానుల్లో మన దేశ రాజధాని ఢిల్లీ తొలి స్థానంలో ఉంది. ప్రపంచంలో అత్యంత కాలుష్య రాజధానుల్లో ఢిల్లీ తొలి స్థానంలో నిలవడం వరసగా ఇది మూడోసారి కావడం ఆందోళన కలిగించే విషయం. లాక్‌డౌన్‌ కారణంగా వాతావరణంలో పీఎం 2.5 స్థాయి 11 శాతం తగ్గినప్పటికీ భారత్‌లో పరిస్థితిలో మార్పు రాకపోవడం మరింత ఆందోళన కలిగించే విషయం.ప్రపంచంలో అత్యంత కాలుష్యమైన 30 నగరాల జాబితా విడుదల చేయగా.. వాటిలో 22 నగరాలు భారత్‌లోనే ఉండటం గమనార్హం. స్విస్ ఎయిర్ క్వాలిటీ టెక్నాలజీ కంపెనీ ఐక్యూ ఎయిర్‌ 2020 సంవత్సరానికి గాను ఈ నివేదికను వెల్లడించింది.ప్రపంచ వ్యాప్తంగా 30 నగరాలు అ‍త్యంత కలుషితమైనవిగా గుర్తించారు. చైనాలోని జింజియాంగ్‌.. ప్రపంచంలో అత్యంత కలుషిత నగరంగా నిలిచింది. ఆ తర్వాత 9 నగరాలు భారత్‌కు చెందినవే కావడం గమనార్హం. ఈ జాబితాలో రెండో స్థానంలో గజియాబాద్‌, మూడో స్థానంలో బులంద్‌షహర్‌ నిలిచాయి. ఈ ర్యాంకింగ్స్‌లో ఢిల్లీ పదో స్థానంలో ఉంది. ప్రపంచంలో అత్యంత కలుషిత రాజధాని నగరాల్లో ఢిల్లీ తొలి స్థానంలో నిలిచింది.భారత్ నుంచి బిస్రఖ్, జలాల్‌పూర్, నోయిడా, గ్రేటర్ నోయిడా, కాన్పూర్, లక్నో, మీరట్, ఆగ్రా, ముజఫర్ నగర్, భీవారీ, జింద్, హిస్సార్, ఫతేహాబాద్, బాంధ్వరి, గురుగ్రామ్, యమునా నగర్, రోహ్‌తక్, ధారుహేరా, ముజఫర్‌పూర్‌ (బిహార్)లు ఈ జాబితాలో నిలిచాయి.ప్రపంచంలో కాలుష్యంలో బంగ్లాదేశ్‌, పాకిస్థాన్‌ దేశాలు వరసగా తొలి రెండు స్థానాల్లో నిలిచాయి. ఆ తర్వాత భారత్ ఉంది. భారత్‌లో కాలుష్య ప్రభావం ప్రమాదకరంగానే ఉన్నట్లు ఐక్యూ ఎయిర్‌ నివేదిక అభిప్రాయపడింది. 2020 సంవత్సరంలో ప్రపంచంలో అత్యంత కనిష్ట గాలి నాణ్యత ప్రాంతాల్లో దక్షిణాసియా ముందు నిలిచిందని పేర్కొంది.ప్రపంచ ఆరోగ్య సంస్థ (WHO) ప్రమాణాల ప్రకారం.. గాలిలో పీఎం 2.5 స్థాయి 10 మైక్రో గ్రాములు మించకూడదు. భారత ప్రమాణాల ప్రకారం 40 మైక్రో గ్రాములు వరకు ఉండొచ్చు. కానీ, ఢిల్లీలో కాలుష్య తీవ్రత డబ్ల్యూహెచ్‌ఓ నిర్దేశించిన ప్రమాదకర స్థాయి కంటే 14 రెట్లు ఎక్కువగా నమోదవుతోంది. లాక్‌డౌన్‌ ఆంక్షల కారణంగా గతేడాది ఢిల్లీ ప్రజలు కొంతకాలం స్వచ్ఛమైన గాలి పీల్చినప్పటికీ.. చలి కాలం వచ్చే సరికి పరిస్థితి మళ్లీ ప్రమాదకరంగా మారింది. గాలి కాలుష్యం కారణంగా ఢిల్లీలో ఏటా సుమారు 54 వేల మంది మరణిస్తున్నట్లు అంచనా