భోపాల్, మార్చి 20, 
ఉప్పెన సినిమా రియల్ లైఫ్ సీన్ ఇది.. తనపై అత్యాచారానికి ప్రయత్నించిన వ్యక్తికి ఓ మహిళ జీవితంలో అతడు మరిచిపోలేని విధంగా గుణపాఠం చెప్పింది.. భర్తలేని సమయంలో ఇంట్లోకి దూరిన కామాంధుడు ఆమెపై అఘాయిత్యానికి ప్రయత్నించాడు. మృగాడితో 20 నిమిషాలపాటు పెనుగులాడిన బాధితురాలు.. చివరకు అతడి నుంచి తప్పించుకుంది. మంచం కింద ఉన్న కొడవలిని తీసుకుని అతడి మర్మాంగాలను కోసేసింది. అనంతరం పోలీస్ స్టేషన్‌కు వెళ్లి ఫిర్యాదు చేసింది. సంచల ఈ ఘటన మధ్యప్రదేశ్‌లోని సిధి జిల్లా ఖాడ్డీ పోలీస్ స్టేషన్ పరిధి ఉమర్హి గ్రామంలో  రాత్రి చోటుచేసుకుంది.ఖాడ్డీ పోలీస్ స్టేషన్ ఎస్ఐ ధర్మేంద్ర సింగ్ రాజ్‌పుత్ తెలిపిన వివరాల ప్రకారం.. ఉమర్హి గ్రామానికి చెందిన బాధిత మహిళ (45) భర్త పనిమీద వేరే ప్రాంతానికి వెళ్లడంతో 13 ఏళ్ల కుమారుడు, ఆమె ఇంట్లో ఉన్నారు. ఈ సమయంలో నిందితుడు ఇంట్లోకి ప్రవేశించడంతో దొంగగా భావించిన ఆమె కుమారుడు ఇరుగు పొరుగువారిని పిలవడానికి బయటకు పరుగులు తీశాడు. దీంతో ఒంటిరిగా ఉన్న ఆమెను కొట్టి బలాత్కారం చేయబోయాడు.కామాంధుడి బారి నుంచి రక్షించుకోడానికి బాధితురాలు దాదాపు 20 నిమిషాలపాటు పెనుగులాడింది. ‘అతడి నుంచి తప్పించుకునే ప్రయత్నంలో మంచం కింద ఉన్న కొడవలి తీసుకుని అతడి మర్మాంగాన్ని కోసేసింది.. అనంతరం రాత్రి 1.30 గంట ప్రాంతంలో పోలీస్ ఔట్‌పోస్ట్ వద్దకు చేరుకుని ఫిర్యాదుచేసింది’ అని రాజ్‌పుత్ తెలిపారు.నిందితుడిని పోలీసులు ఆస్పత్రికి తీసుకెళ్లి ప్రథమ చికిత్స చేయించారని అన్నారు. వైద్యుల సూచనలతో అతడిని సిధి జిల్లా ఆస్పత్రికి తరలించగా.. అక్కడ నుంచి రేవా జిల్లాలోని సంజయ్ గాంధీ మెడికల్ కాలేజ్ అండ్ ఆస్పత్రికి తీసుకెళ్లారు.నిందితుడిపై అత్యాచారం, హత్యాయత్నం కేసులు నమోదుచేసినట్టు పోలీసులు తెలిపారు. నిందితుడు కూడా మహిళకు వ్యతిరేకంగా ఫిర్యాదు చేశాడని అన్నారు. ప్రస్తుతం అతడు ఆస్పత్రిలో చికిత్స పొందుతున్నారు.