విజయవాడ, మార్చి 24, 
ఆంధ్రప్రదేశ్‌లో కరోనా వైరస్ మహమ్మారి మరోసారి డేంజర్ బెల్స్ మోగిస్తోంది. గత కొన్ని నెలలతో పోలిస్తే అత్యధిక కరోనా కేసులు నమోదయ్యాయి. ఇటీవల కాలంలో ఎన్నడూ లేనంతగా గడిచిన 24 గంటల వ్యవధిలో 492 కరోనా పాజిటివ్‌ కేసులు నిర్ధారణ అయ్యాయి. ఒక్క రోజు వ్యవధిలో 33,634 శాంపిల్స్ పరీక్షించగా 492 మందికి పాజిటివ్‌గా తేలింది. దీంతో రాష్ట్రవ్యాప్తంగా కోవిడ్‌ కేసుల సంఖ్య 8,94,536కి చేరింది.ఈ మేరకు  వైద్య ఆరోగ్య శాఖ బులెటిన్‌ విడుదల చేసింది. అలాగే గడిచిన 24 గంటల్లో కరోనా చికిత్స పొందుతూ చిత్తూరు, విశాఖపట్నం జిల్లాల్లో ఒక్కొక్కరు చొప్పున మరణించారు. దీంతో ఇప్పటి వరకు రాష్ట్రంలో కోవిడ్‌తో మృతి చెందిన వారి సంఖ్య 7193కి చేరింది.గడిచిన 24 గంటల్లో 256 మంది కరోనా నుంచి పూర్తిగా కోలుకోగా.. ప్రస్తుతం రాష్ట్రంలో 2,616 యాక్టివ్‌ కేసులున్నాయి. ఇప్పటివరకు రాష్ట్రవ్యాప్తంగా 1,48,05,335 నమూనాలను పరీక్షించినట్లు ప్రభుత్వం బులెటిన్‌లో పేర్కొంది. ఇక, తూర్పు గోదావరి జిల్లాలో అత్యధికంగా మంగళవారం ఒక్కరోజే 168 మందికి పాజిటివ్‌గా తేలడం కలకలం రేపుతోంది. కాగా, సోమవారం ఒక్క రోజే రాజమండ్రిలోని ఓ కాలేజీలో 163 మంది విద్యార్థులకు కరోనా సోకిన విషయం తెలిసిందే. ఈ విషయాన్ని మంగళవారం బులిటెన్‌లో వైద్య ఆరోగ్య శాఖ నిర్ధారించింది.