హైదరాబాద్, మార్చి 24, దేశంలో కరోనా కేసులు పెరుగుతున్న తీరు చూస్తుంటే సెకండ్ వేవ్ తప్పదనే భయాందోళనలు వ్యక్తం అవుతున్నాయి. దీంతో తెలంగాణ ప్రభుత్వం అప్రమత్తమైంది. కేసుల సంఖ్య పెరిగినా ఎదుర్కొనేందుకు సిద్ధపడుతోంది. కరోనా వైరస్ ప్రభావంతో తీవ్ర ఇబ్బందులను ఎదుర్కొన్న తెలంగాణ ఇప్పుడిప్పుడే కోలుకుంటోంది. కోవిడ్ చికిత్స కోసం వైద్య సిబ్బంది నిరంతరం శ్రమించాల్సి రావడంతోపాటు.. రాష్ట్ర ఆర్థిక వ్యవస్థ సతమతమైంది. ఇప్పుడిప్పుడే ఊపిరి పీల్చుకుంటున్న తెలంగాణ సర్కారుకు.. రాష్ట్రంలో కరోనా కేసులు పెరుగుతుండటం కలవరానికి గురి చేస్తోంది. దేశంలో కరోనా కేసులు పెరుగుతున్న తీరును చూస్తుంటే సెకండ్ వేవ్‌కు దారితీస్తుందేమోనని తెలంగాణ  ప్రజారోగ్య శాఖ డైరెక్టర్ డాక్టర్ శ్రీనివాసరావు ఆందోళన వ్యక్తం చేశారు. కరోనాను ఎదుర్కోవడానికి తాము సిద్ధంగా ఉన్నామని డాక్టర్ శ్రీనివాస రావు తెలిపారు. గాంధీ హాస్పిటల్‌లో కరోనా రోగుల కోసం పడకలను పెంచుతామన్న ఆయన.. అవసరమైతే మరోసారి గాంధీ హాస్పిటల్‌ను కరోనా సేవలకు పరిమితం చేస్తామన్నారు. కరోనా కట్టడి కోసం పరీక్షలను పెంచడంతోపాటు.. కాంటాక్టులను గుర్తించడం, చికిత్సపై అప్రమత్తంగా ఉన్నామని ప్రజారోగ్య శాఖ డైరెక్టర్ తెలిపారు. పొరుగున ఉన్న కర్ణాటక, మహారాష్ట్రతో పోలిస్తే తెలంగాణలో పరిస్థితులు అదుపులోనే ఉన్నాయన్నారు. గత 24 గంటల్లో రాష్ట్రంలో 400కిపైగా కరోనా కేసులు నమోదయ్యాయి. ప్రస్తుతం తెలంగాణలో 3151 యాక్టివ్ కేసులు ఉన్నాయి. మన దేశంలో మొత్తం కోవిడ్ కేసుల సంఖ్య 1.16 కోట్లు దాటింది. రాష్ట్రంలో క్రమంగా కరోనా కేసుల సంఖ్య పెరుగుతుండటం.. పెద్ద సంఖ్యలో పాఠశాల విద్యార్థులు ఇన్ఫెక్షన్‌కి గురవుతుండటంతో.. మార్చి 24 నుంచి పాఠశాలలను మూసివేస్తున్నట్టు ప్రభుత్వం ప్రకటించింది.