హైదరాబాద్, మార్చి 27, 
మీ న్యూడ్ వీడియోలు బాగున్నాయ్‌... మీ ఫ్రెండ్స్‌ అందరికీ పంపేద్దామా?’ అంటూ బెదిరింపులకు పాల్పడిన సైబర్ కిలేడీ ఈవెంట్ మేనేజర్ నుంచి ఏకంగా రూ.10లక్షలు కొట్టేసింది. ఇంకా డబ్బులు డిమాండ్ చేస్తుండటంతో విసిగిపోయిన బాధితుడు హైదరాబాద్ సైబర్ క్రైమ్ పోలీసులను ఆశ్రయించాడు. దీంతో పోలీసులు కేసు నమోదు చేసుకుని దర్యాప్తు చేపట్టారు. తార్నాకలో నివసించే ఓ వ్యక్తి ఈవెంట్‌ మేనేజర్‌‌గా పనిచేస్తున్నాడు. వారం రోజుల క్రితం అతడి ఫేస్‌‌బుక్ అకౌంట్‌కు ఓ యువతి ఫ్రెండ్ రిక్వెస్ట్ పంపించగా అతడు అంగీకరించాడు. మరుసటి రోజు ఆమె వాట్సాప్ నంబర్ అడిగితే ఇచ్చాడు. రెండ్రోజుల క్రితం అతడికి వీడియో కాల్ చేసిన యువతి ఒక్కసారిగా దుస్తులు విప్పేసి షాకిచ్చింది. నిన్ను కూడా అలా చూడాలని ఉందంటూ రెచ్చగొట్టడంతో అతడు కూడా దుస్తులు విప్పేసి న్యూడ్‌ కాల్ మాట్లాడాడు.కాల్ కట్ చేసిన వెంటనే అతడికి ఆ నగ్న వీడియోను వాట్సాప్‌లో పంపించిన యువతి రూ.5లక్షలు ఇవ్వకపోతే ఫేస్‌బుక్‌లో పోస్ట్ చేస్తానని బ్లాక్‌మెయిల్ చేసింది. పరువు పోతుందని భావించిన బాధితుడు ఆమె చెప్పిన అకౌంట్‌‌కి రూ.5లక్షలు పంపించాడు. మళ్లీ రూ.5లక్షలు డిమాండ్ చేయగా స్నేహితుల వద్ద అప్పు చేసి మరీ ట్రాన్స్‌ఫర్ చేశాడు. మరో రూ.10లక్షలు కావాలంటూ యువతి బ్లాక్‌మెయిల్ చేయడంతో విసిగిపోయిన బాధితుడు సైబర్ క్రైమ్ పోలీసులను ఆశ్రయించాడు.