న్యూఢిల్లీ, మార్చి 30, 
మానవ ప్రయత్నాలకు ప్రకృతి సహకరిస్తేనే ఏపనైనా విజయవంతమవుతుందని తాజాగా ఎవర్ గివెన్ ఉదంతం నిరూపించింది. మానవ ప్రయత్నాలతో పాటు ప్రకృతి సాయం వల్లే ఈ భారీ నౌక కదిలొచ్చింది. నౌక ముందు భాగంలో ఇసుక, మట్టిని తవ్వుతుండగా పౌర్ణమి ప్రభావంతో కాలువలోకి అలలు పోటెత్తాయి. దీంతో ఇసుకలో కూరుకుపోయిన నౌక ఒక్కసారిగా పైకిలేచింది.అంతర్జాతీయ వాణిజ్యానికి కీలకమైన సూయిజ్‌ కాలువలో మార్చి 23న ఇరుక్కుపోయిన భారీ కంటైనర్‌ నౌక ‘ఎవర్‌ గివెన్‌’ఎట్టకేలకు కదిలింది. ఇసుక తుఫాను, బలమైన గాలుల కారణంగా నౌక అడ్డం తిరిగి.. దాని ముందుభాగంలో ఉన్న కొమ్ము కూరుకుపోయిన విషయం తెలిసిందే. దీంతో నౌకను పునరుద్ధరించడానికి ఆరు రోజులుగా చేసిన ప్రయత్నాలు సోమవారం ఫలించాయి. ఇసుక, బంకమట్టిని డ్రెడ్జర్ల ద్వారా తవ్వుతుండగా.. టగ్‌బోట్లు నౌకను కదిలించాయి. వీటికి సముద్రపు పోటు కూడా తోడువ్వడంతో అనుకున్న సమయం కంటే ముందుగానే ఎవర్‌గివెన్‌ తిరిగి సాధారణ స్థితికి తీసుకొచ్చారు.అయితే, నౌకను కదిలించే ప్రయత్నాల్లో పౌర్ణమి వల్ల ఏర్పడిన సముద్రపు పోటు అపారంగా సాయపడిందని సహాయక బృందాలు పేర్కొన్నాయి. సూర్య, చంద్రుల గురుత్వాకర్షణ వల్ల సముద్రంలో ఆటుపోట్లు ఏర్పడుతుంటాయి. సాధారణంగా పౌర్ణమి రోజుల్లో అలల ఉవ్వెత్తున్న ఎగిసిపడి తీరంవైపు దూసుకొస్తాయి. గత ఆదివారం పౌర్ణమి కావడంతో సూయిజ్‌ కాలువలోకి సముద్రపు అలలు పోటెత్తాయి. ఈ పోటుతో కూరుకుపోయిన ఎవర్‌ గివెన్‌ బయటకు వచ్చేందుకు సాయపడింది.ఆదివారం మధ్యాహ్నం సమయంలో ఏర్పడిన సముద్రపు పోటు మాకు గొప్ప సాయం చేసింది. అలల పోటు నౌకకు బలంగా నెట్టింది. ఈ పోటు సమయంలో అలల శక్తి రెండు టగ్‌ బోట్లు లాగినంతదానికంటే ఎక్కువగా ఉంది’ అని సహాయక చర్యల్లో పాల్గొన్న అమెరికా సంస్థ బోస్కోలిస్ వెస్ట్‌మినిస్టర్ సీఈఓ పీటర్ బెర్డోస్కీ అన్నారు. ఎవర్‌ గివెన్‌ మళ్లీ కదిలిందంటే దానికి చంద్రుడి గురుత్వాకర్షణ శక్తి కూడా ఓ ప్రధాన కారణమని వ్యాఖానించారు.నౌక నీటిపై తేలిన తర్వాత దాన్ని తిరిగి సాధారణ స్థితిలోకి తీసుకురావడం కూడా చాలా కష్టమైందని ఆయన అన్నారు. నౌక నీటిపై పూర్తిగా తేలిన తర్వాత ఆందోళన మరింత ఎక్కువైందని పేర్కొన్నారు. కాలువ మరో భాగానికి తాకకుండా టగ్‌బోట్ల సాయంతో నౌకను నిలువుగా తీసుకురాకుంటే పరిస్థితి మరింత తీవ్రంగా మారుతుందని వివరించారు. నౌకను సాధారణ స్థితికి తీసుకొచ్చే ఆ పది నిమిషాలు అందరిలోనూ టెన్షన్‌ ఎక్కువైందని పీటర్‌ పేర్కొన్నారు.