కర్ణాటక అసెంబ్లీ ఎన్నికల్లో సినీతారల హంగామా ఆసక్తిదాయకంగా మారింది. మిగతా దక్షిణాది రాష్ట్రాల్లాగే కర్ణాటక రాజకీయాల్లో కూడా సినిమా తారలు తమ లక్‌ను పరీక్షించుకుంటున్నారు. ప్రధానంగా త్రిముఖ పోరు జరుగుతున్న కర్ణాటక అసెంబ్లీ ఎన్నికల్లో మూడు పార్టీల తరఫునా సినిమా వాళ్లు పోటీలో ఉండటం గమనార్హం.

శాండల్‌వుడ్ సీనియర్ నటి ఉమశ్రీ కాంగ్రెస్ పార్టీ తరఫున పోటీ చేస్తున్నారు. గతంలో ఈమె ఎమ్మెల్యేగా గెలవడంతో పాటు మంత్రిగా కూడా వ్యవహరించారు. ప్రస్తుతం తెరదాళ నియోజకవర్గం నుంచి ఆమె ఎమ్మెల్యేగా పోటీలో ఉన్నారు.తెలుగుతో పాటు కన్నడలోనూ పాపులర్ అయిన నటుడు సాయికుమార్ ఈ సారి బీజేపీ టికెట్ సంపాదించుకోగలిగారు. అనంతపురం జిల్లాకు సరిహద్దుల్లో ఉన్న, కర్ణాటకలో భాగమైన బాగేపల్లి నుంచి సాయికుమార్ బీజేపీ తరఫున పోటీ చేస్తున్నారు.ఇక కన్నడ స్టార్ కమేడియన్ కమ్ హీరో జగ్గేష్ కూడా ఈ సారి ప్రత్యక్ష ఎన్నికల బరిలోకి దిగాడు. బెంగళూరు సిటీలో భాగమైన యశ్వంతపుర నుంచి జగ్గేష్ బీజేపీ తరఫున నామినేషన్ దాఖలు చేశారు. ఇక్కడ నుంచి శోభా కరంద్లజే పోటీలో ఉంటుందన్న ఊహాగానాలున్నా, జగ్గేష్‌కు అవకాశం దక్కింది.మరో నటుడు శశికుమార్ కాంగ్రెస్ పార్టీని వీడి జేడీఎస్‌లో చేరాడు. హోసదుర్గ నుంచి ఈయన పోటీలో ఉన్నారు. ఇక కర్ణాటక మాజీ సీఎం బంగారప్ప తనయులిద్దరూ సినీ రంగంలో పనిచేసిన అనుభవం ఉన్న వారే. వీరిద్దరూ ఇప్పుడు చెరో పార్టీ తరఫున పోటీలో ఉన్నారు. కుమార బంగారప్ప బీజేపీ తరఫు నుంచి మధు బంగారప్ప జేడీఎస్ నుంచి పోటీలో ఉన్నారు. సొరబ నియోజకవర్గంలో ఈ అన్నదమ్ములిద్దరూ ముఖాముఖి తలపడుతున్నారు.కాంగ్రెస్ పార్టీ తరఫున తనకు టికెట్ లభించినప్పటికీ పోటీ నుంచి తప్పుకున్నాడు రెబల్ స్టార్ అంబరీష్. అనారోగ్య కారణాలతో ఆయన తప్పుకున్నారు. ఆయన భార్య సుమలత పోటీలో ఉంటుందని అనుకుంటే ఆమె కూడా ముందుకు రాలేదు.ఇక మరో నటి రమ్య కాంగ్రెస్ పార్టీ తరఫున యాక్టివ్‌గా ఉన్నారు. ప్రస్తుత ఎన్నికల్లో పోటీ చేయడం లేదు కానీ, స్టార్ క్యాంపెయినర్‌గా ప్రచారం చేస్తున్నారామె.