హెచ్‌డీఎఫ్‌సీ బ్యాంక్ టర్మ్ డిపాజిట్లపై వడ్డీరేట్లను ఒక శాతం  వరకు పెంచింది. ఈ పెంపుదలతో ఏడాదిలోగా అన్ని మెచ్యూరిటీలపై 7 % వడ్డీని అందించనుంది. దీనివల్ల సీనియర్ సిటిజన్లు, మరెందరో డిపాజిటర్లు దాదాపు 7.5 శాతం లాభాలను ఆర్జించనున్నారు. హెచ్‌డీఎఫ్‌సీ బ్యాంక్ 7.9 లక్షల కోట్ల డిపాజిట్లతో... దేశ బ్యాంకు డిపాజిట్ల విభాగంలో 7 శాతం వాటాను కలిగి ఉంది. స్టేట్ బ్యాంక్ ఆఫ్ ఇండియా గత ఫిబ్రవరిలో డిపాజిట్ రేట్లను 50 బేసిస్ పాయింట్లకు పెంచిన సంగతి తెలిసిందే. ఇతర బ్యాంకులు కూడా ఇదే బాటలో పయనించే అవకాశం ఉంది. ఇది రుణ రేట్లమీద కూడా ప్రభావం చూపే అవకాశం ఉంది. రిజర్వు బ్యాంకు ఆఫ్ ఇండియా (ఆర్బీఐ) విడుదల చేసిన గణాంకాల ప్రకారం, 2018 మార్చి 30 నాటికి బ్యాంకు డిపాజిట్లు రూ. 115 లక్షల కోట్లుగా నమోదయ్యాయి. 6.7 శాతం వృద్ధిరేటు నమోదైంది. అంతకుముందు ఆర్థిక సంవత్సరంలో వృద్ధిరేటు 15.3 శాతంగా ఉంది. దీనికి భిన్నంగా బ్యాంక్ అడ్వాన్స్ 10.3 శాతం వృద్ధి చెంది రూ.87 లక్షల కోట్లుగా నమోదైంది. అంతకుముందు ఆర్థిక సంవత్సరంలో ఇది 8.2 శాతంగా ఉంది.