భారత ఫుట్‌బాల్ దిగ్గజం బైచుంగ్ భూటియా కొత్త పార్టీ ప్రకటించారు. తన పార్టీ పేరును ‘హమ్రో సిక్కిం’గా ప్రకటించారు.   ఢిల్లీలోని ప్రెస్ క్లబ్ ఆఫ్ ఇండియాలో ఈ మేరకు ప్రకటించారు. రెండు రోజుల కిందట తృణమూల్‌ కాంగ్రెస్‌ (టీఎంసీ)కు రాజీనామా చేసిన భూటియా.. కొత్త పార్టీని స్థాపించబోతున్నట్లు బుధవారం ట్విటర్ ద్వారా వెల్లడించారు.సిక్కిం రాజకీయాల్లో కీలక పాత్ర పోషించాలని భావిస్తున్న భూటియా.. అందుకు అనుగుణంగా కార్యాచరణ సిద్ధం చేస్తున్నారు. ఢిల్లీలో సిక్కిం ప్రాధాన్యాన్ని నిలపడానికి ప్రయత్నం చేస్తానని ఆయన ప్రకటించారు.2011లో ఫుట్‌బాల్‌ ఆటకు గుడ్ బై చెప్పిన భూటియా.. 2013లో మమతా బెనర్జీ నేతృత్వంలోని తృణమూల్ కాంగ్రెస్‌లో చేరారు. అయితే కొంతకాలంగా ఆయనకు పార్టీ నేతలతో పొసగడంలేదని వార్తలొచ్చాయి. ప్రత్యేక గోర్ఖాలాండ్ రాష్ట్ర ఏర్పాటును కోరుతూ డార్జిలింగ్‌వాసులు 104 రోజుల ఆందోళన నిర్వహించిన సమయంలో భూటియా వారికి మద్దతు తెలిపారు. దీంతో టీఎంసీతో ఆయనకు భేదాభిప్రాయాలు మరింతగా పెరిగాయి.తృణమూల్‌ కాంగ్రెస్‌ పార్టీ నుంచి వైదొలగనున్నట్లు భూటియా గత ఫిబ్రవరిలోనే సంకేతాలిచ్చారు. ఏ పార్టీతోనూ సంబంధం పెట్టుకోనని తెలిపారు. 2014 ఎన్నికల్లో టీఎంసీ తరఫున భూటియా.. డార్జిలింగ్ నియోజకవర్గం నుంచి పోటీ చేసి ఓడిపోయారు. ప్రస్తుత బీజేపీ మంత్రి ఎస్ ఎస్ అహ్లువాలియా చేతిలో ఆయన పరాజయం పాలయ్యారు.