కావేరీ జల పంపిణీ పథకాన్ని రూపొందించేందుకు రెండు వారాలపాటు గడువు పొడిగించాలని సుప్రీంకోర్టును కేంద్ర ప్రభుత్వం శుక్రవారం కోరింది. వచ్చే నెల 3 నాటికి ఓ పథకాన్ని రూపొందించాలని సుప్రీంకోర్టు గడువు విధించిన సంగతి తెలిసిందే. అయితే ఈ ఆదేశాలను సవరించేందుకు సుప్రీంకోర్టు ప్రధాన న్యాయమూర్తి జస్టిస్ దీపక్ మిశ్రా తిరస్కరించారు. తమ ఆదేశాలు కొనసాగుతాయని స్పష్టం చేశారు. తమ తీర్పు ప్రకారం పథకాన్ని రూపొందించవలసిన కర్తవ్యం కేంద్ర ప్రభుత్వానికి ఉందన్నారు. ఎంతో అధ్యయనంచేసి, శ్రమకోర్చి ఈ తీర్పునిచ్చినట్లు తెలిపారు. ఇప్పటికీ దీనిని అనుసరించి పథకాన్ని రూపొందించడంపై దృఢ నిశ్చయం కనబరచడం లేదని కేంద్ర ప్రభుత్వాన్ని దుయ్యబట్టారు. గడువు పెంపుపై కేంద్ర ప్రభుత్వ దరఖాస్తును వచ్చే నెల 3 న పరిశీలిస్తామని తెలిపారు.తమిళనాడు, కర్ణాటక రాష్ట్రాల మధ్య కావేరీ జలాల పంపిణీపై ఫిబ్రవరి 16న సుప్రీంకోర్టు తీర్పు చెప్పింది. దీని ప్రకారం నీటి పంపకాల కోసం ఓ పథకాన్ని రూపొందించాలని కేంద్ర ప్రభుత్వాన్ని ఈ నెల 9న ఆదేశించింది. ప్రధాన న్యాయమూర్తి జస్టిస్ దీపక్ మిశ్రా నేతృత్వంలోని ధర్మాసనం ఈ ఆదేశాలిచ్చింది. 200 సంవత్సరాల నుంచి కొనసాగుతున్న ఈ వివాద పరిష్కారంపై కేంద్ర ప్రభుత్వానికి దృఢ నిశ్చయం ఉందో, లేదోనని సందేహం వ్యక్తం చేసింది.