విజయవాడ, ఏప్రిల్ 24, 
దేశవ్యాప్తంగా కరోనా పంజా విసురుతోంది. కేసుల సంఖ్య భారీగా పెరుగుతోంది.. ఈ క్రమంలో కొన్ని రాష్ట్రాల్లో రాత్రి కర్ఫ్యూ విధించారు. కొన్నిచోట్ల లాక్‌డౌన్ పరిస్థితులు ఉన్నాయి. ఇప్పటికే తెలంగాణతో పాటూ తమిళనాడు, కర్ణాటకలో కూడా ఆంక్షలు కొనసాగుతున్నాయి. ఏపీలో కూడా రాత్రి కర్ఫ్యూ విధించారు.. శనివారం నుంచి ఆంక్షలు అమల్లోకి  వచ్చాయి. రాత్రి 10 గంటల నుంచి ఉదయం 5 గంటల వరకు అత్యవసర సేవలు మినహా మిగిలినవి ఏవీ పని చేయవు. దుకాణాలు, ప్రజా రవాణా, షాపింగ్‌ మాల్స్‌, సినిమా థియేటర్లను మూసి వేయనున్నారు.కర్ఫ్యూ నుంచి ఫార్మసీలు, ల్యాబ్‌లు, మీడియా, పెట్రోల్‌ బంక్‌లు, శీతల గిడ్డంగులు, గోదాములు, అత్యవసర సర్వీసులకు ప్రభుత్వం మినహాయింపు ఇచ్చింది. వైద్యం కోసం ఆసుపత్రికి వెళ్లే రోగులకు ఎలాంటి ఆంక్షలు ఉండవు. ఇక ఇతర ప్రాంతాల నుంచి ఏపీకి వచ్చే ప్రయాణికుల్లో ఆందోళన మొదలైంది. ముఖ్యంగా హైదరాబాద్‌తో పాటూ పొరుగున ఉన్న చెన్నై, బెంగళూరు నుంచి వచ్చే వారికి అనుమానాలు ఉన్నాయి. ఏపీ ప్రభుత్వం, పోలీసులు దీనిపై క్లారిటీ ఇచ్చారు.కర్ఫ్యూ టైమ్‌లో ఏపీకి వస్తే ప్రయాణానికి సంబంధించిన టికెట్ చూపిస్తే ఇళ్లకు వెళ్లనిస్తామని పోలీసులు చెబుతున్నారు. వారని పికప్ చేసుకునేందుకు వెళ్లే వారు సైతం తమ బంధువులు, స్నేహితుల ప్రయాణానికి సంబంధించిన టికెట్స్ చూపిస్తే చాలు. ఒకవేళ ఎవరైనా హెల్త్ ఎమర్జెన్సీతో సొంత వాహనాల్లో వస్తే డాక్టర్ ఇచ్చిన రిపోర్ట్స్ చూపిస్తే సరిపోతుంది. ఆర్టీసీ, ట్రావెల్స్ బస్సు సర్వీసులు కొనసాగుతున్నాయి.