టూరిస్ట్ అట్రాక్షన్‌గా నిలిచే ప్రముఖ మ్యూజియం మేడమ్‌ టుస్సాడ్స్. అటువంటి ఘనతను తెలుగులో సూపర్ స్టార్ మహేశ్ బాబు పొందనున్నారు. ఈ మ్యూజియంలో టాలీవుడ్ నుంచి తొలిసారి ఒక నటుడి విగ్రహాన్ని ఏర్పాటు చేయనున్నారు. దీనికి సంబంధించి మ్యూజియం ప్రతినిధులు మహేశ్ కొలతలు, వివరాలు కూడా తీసుకున్నారు. ఈ విషయాన్ని నమ్రత, మహేశ్ సోషల్ మీడియా ద్వారా అభిమానులతో పంచుకున్నారు.లండన్‌లో ఏర్పాటైన ఈ మ్యూజియం ప్రపంచవ్యాప్తంగా ప్రముఖ నగరాల్లో తన శాఖలను విస్తరించింది. మన దేశంలో కూడా ఢిల్లీలో ఈ మ్యూజియం ఉంది. చరిత్రకారులు, ఫిల్మ్ స్టార్స్ లాంటి ప్రముఖుల విగ్రహాలను మైనంతో తయారు చేసి ప్రదర్శనకు ఏర్పాటు చేస్తారు. ఈ విగ్రహాలను చూడడానికి టూరిస్ట్‌లు కూడా ఆసక్తి చూపిస్తూ ఉంటారు. ఈ మ్యూజియంలో మైనపు విగ్రహ ప్రదర్శన అంటే అది అరుదైన ఘనతగా చెప్పుకుంటూ ఉంటారు. తాజాగా ‘బాహుబలి’ పాత్రలో ఉన్న ప్రభాస్ విగ్రహాన్ని కూడా ఈ మ్యూజియంలో ఏర్పాటు చేసిన విషయం తెలిసిందే. అయితే.. అది ఒక పాత్రకు సంబంధించిన విగ్రహం. ఇప్పుడు ఏర్పాటు చేస్తున్నది మహేశ్ వ్యక్తిగత మైనపు విగ్రహం కావడంతో మహేశ్‌తో పాటు అభిమానులు కూడా ఆనందాన్ని వ్యక్తం చేస్తున్నారు. త్వరలో ఈ విషయానికి సంబంధించి మరిన్ని వివరాలు వెల్లడి కానున్నాయి.