ఖమ్మం మే 10
కరోనా కట్టడి అంశంలో కేంద్ర ,  రాష్ట్ర ప్రభుత్వాల మాటలు తప్ప చేతలు శూన్యమని , అందుకే నేడు వందలు వేలు దాటి లక్షల సంఖ్యలో ప్రజలు మృతి చెందుతున్నారని లంబాడి హక్కుల పోరాట సమితి రాష్ట్ర ఉపాధ్యక్షుడు బానోతు బద్రు నాయక్  ఒక ప్రకటనలో తీవ్రంగా ఆరోపించారు . ఏదైనా విపత్తు సంభవించినప్పుడు ముందస్తు ఆలోచనతో ప్రణాళిక రూపొందించుకొని దానికనుగుణంగా సమస్య పరిష్కారానికి కృషి చేయకుండా కేంద్ర , రాష్ట్ర ప్రభుత్వ పాలకులు నిర్లక్ష్యంగా వ్యవహరిస్తున్నారని విమర్శించారు . గత సంవత్సరం జనవరిలో మనదేశంలో కరోనా కేసు బయటపడగా తక్షణమే దానిపై కార్యాచరణ ప్రకటించకుండా ఆ నాటి అమెరికా అధ్యక్షుడు ట్రంప్ ను ఆహ్వానించిన ప్రధాని మోడీ గుజరాత్ రాష్ట్రంలో లక్షలాది మంది తో భారీ బహిరంగ సభను తలపెట్టి పెద్ద పొరపాటు చేశారని , ఆ తర్వాత  రెండు నెలల అనంతరం మార్చి 24న ఎక్కువ సమయం కేటాయించకుండా ఎవరినీ సంప్రదించకుండా ఏకపక్షంగా లాక్ డౌన్ విధించారని గుర్తు చేశారు . ఆ సమయంలో భారతదేశం వ్యాప్తంగా కరోనా కేసులు వందలలో ఉంటే మరణాలు కేవలం తొమ్మిది మాత్రమే ఉన్నాయని తెలిపారు . కరోనా రెండవ దశ గురించి ముందస్తు హెచ్చరికలు , ఉన్నప్పటికీ అది ఎంత ప్రమాదకరంగా ఉంటుందో అని తెలిసినప్పటికీ , విస్మరించి , నిర్లక్ష్యంగా ఐదు రాష్ట్రాల ఎన్నికలు నిర్వహించడమే కాకుండా అనేక ర్యాలీలు తలపెట్టడం ,   లక్షలాది మంది గుమ్మి కూడే మతపర కార్యక్రమo కుంభమేళ కు అనుమతులు ఇవ్వడం ఆత్మహత్యా సదృశ్య మైన విషయమని దుయ్యబట్టారు . పాలకుల నిర్లక్ష్యం , నిర్లిప్తత , బాధ్యతా రాహిత్యంను దృష్టిలో పెట్టుకుని పలు రాష్ట్రాల్లోని హైకోర్టులు తీవ్రమైన వ్యాఖ్యలు చేస్తున్నాయని చెప్పారు . రోజుకు మూడు లక్షలకు పైగా కేసులు నమోదవుతున్నా , అదే స్థాయిలో లక్షలాదిమంది ఆక్సిజన్ లు , బెడ్లు అందకుండా మరణిస్తున్నా  ప్రధాని మోడీ గాని తెలంగాణ రాష్ట్ర ముఖ్యమంత్రి కేసీఆర్ గాని దీనిపై ఒక ప్రణాళికను సిద్ధం చేయకపోవడం అత్యంత విచారకరమన్నారు . గత ఏడాది ప్రపంచ ఆరోగ్య సంస్థ కరోనా విషయంలో పలు హెచ్చరికలు జారీచేసిన మనం వాటిని పరిగణలోకి తీసుకోకపోవటం క్షమార్హం కానీ అంశమన్నారు . 45 సంవత్సరాల పైబడి వయసు గల వారికి ఇంకా రెండవ డోసు లోనే ఉన్న ఆ సమయంలో మే1 నుండి 18 సంవత్సరాల వయసు వారికి కూడా వ్యాక్సిన్లను ఇస్తున్నామని , అంతలోనే వెనుదిరగడం మనకు గల ముందు చూపు ఎంత ఉన్నదో , మన వైఖరి , మన చిత్తశుద్ధి ఏమిటో తెలియజేస్తుంది అన్నారు . అనేక అభివృద్ధి చెందిన దేశాలలో టీకా కార్యక్రమం అత్యంత వేగవంతంగా కొనసాగుతూ ఇప్పటికీ సుమారుగా పాతిక శాతం చేరుకున్నది . ఈ సమయంలోనే మనం ఇంకా రెండు శాతం కూడా దాటలేదని వార్తలు రావటం బాధాకరంగా ఉందన్నారు . ప్రజల జీవితాలతో ఆటలాడకుండ  కేంద్ర , రాష్ట్ర ప్రభుత్వాలు ఇకనైనా చిత్తశుద్ధితో కరోనా వ్యాక్సిన్ ల విషయంలో గాని , ఆక్సిజన్ ల విషయంలో గాని  ఆస్పత్రుల బెడ్లకు సంబంధించిన విషయంలో గాని అవాస్తవాలు చెప్పకుండా , పారదర్శకంగా వ్యవహరించాలని డిమాండ్ చేశారు . కరోనా కారణంగా చనిపోతున్న అనేక మందిని చూసి మద్రాసు హైకోర్టు చెప్పినట్టు , ఎన్నికల సంఘందే ప్రధాన బాధ్యత , ఆ ఎన్నికల సంఘం పై మర్డర్ కేసు ఎందుకు నమోదు చేయకూడదని ప్రశ్నించిన క్రమంలో మన పాలకుల విధానాన్ని కూడా తీవ్రంగా తూర్పార పట్టాల్సిన అవసరం ఉందని , ఆయా ప్రభుత్వాలపై కూడా అ మర్డర్ కేసులను నమోదు చేయాలని న్యాయస్థానాలు ఆదేశిస్తే బావుంటుందని బానోతు బద్రు నాయక్ పేర్కొన్నారు . ఇదిలా ఉండగా , అప్పుడే కొంతమంది కరోనా మూడో దశ గురించి వివరిస్తూ , వల్లకాడుగా మారుస్తుందని చేస్తున్న హెచ్చరికలు పాలకుల చెవిన పడటం లేదని ఇక న్యాయ స్థానాలులే క్రియాశీలక పాత్రను పోషించాలని కోరారు.