బాలీవుడ్ సూపర్‌స్టార్ అమితాబ్ బచ్చన్‌కు రవీంద్ర భారతి యూనివర్సిటీ (ఆర్బీయూ) ఊహించని షాక్ ఇచ్చింది. ఈ ఏడాది గౌరవ డాక్టరేట్ గ్రహీతల జాబితా నుంచి ఆయన పేరును తొలగించింది. గవర్నర్ కేసరి నాథ్ త్రిపాఠి ఆదేశాల మేరకు ఈ నిర్ణయం తీసుకున్నట్టు ఆర్బీయూ వైస్ చాన్సిలర్ సవ్యసాచి బసు రాయ్ చౌదరి వెల్లడించారు. స్నాతకోత్సవానికి రాని వారికి గౌరవ సత్కారం ఇవ్వరాదని త్రిపాఠి స్పష్టం చేసినట్టు చౌదరి వెల్లడించారు.ముందస్తు షూటింగ్‌ల కారణంగా తాను మే8 న జరిగే ఆర్బీయూ 43వ స్నాతకోత్సవాలకు రాలేననీ... డి లిట్ స్వీకరించలేనని అమితాబ్ చెప్పడంతో గవర్నర్ ఈ నిర్ణయం తీసుకున్నట్టు కనిపిస్తోంది. కాగా ఈ ఏడాది ఆర్బీయూ నుంచి గౌరవ డాక్టరేట్ అందుకోనున్న ప్రముఖుల్లో ప్రముఖ రచయిత్రి నబంతియా దేవ్ సేన్, చిత్రకారుడు జతిన్ దాస్, శాస్త్రీయ గాయకుడు పీటీ. అమియా రంజన్ బందోపాధ్యాయ్ తదితరులు ఉన్నట్టు వీసీ వెల్లడించారు.