కరీంనగర్, మే 18, 
ఈటల రాజేందర్ వ్యవహారంతో హుజూరాబాద్‌ నియోజకవర్గంలో రాజకీయాలు రోజుకో రకంగా మారుతున్నాయి. మంత్రి వర్గం నుంచి బర్తరఫ్‌ అయిన రాజేందర్‌కు వ్యతిరేకంగా నియోజకవర్గంలో బలగాన్ని పెంచుకునే దిశగా జిల్లాకు చెందిన మంత్రి గంగుల కమలాకర్‌ తన ప్రయత్నాలు కొనసాగిస్తున్నారు. నియోజకవర్గంలో జడ్పీటీసీలు, ఎంపీపీలు, ఎంపీటీసీలు, సర్పంచులుగా ఎన్నికైన ప్రజాప్రతినిధులు భవిష్యత్తులో ఈటల వైపు వెళ్లకుండా చర్యలు తీసుకుంటున్నారు. తననియోజకవర్గంలో గంగుల జోక్యంపై శనివారం ఈటల రాజేందర్‌ ఆగ్రహం వ్యక్తం చేసిన విషయం తెలిసిందే. గొర్రెల మంద మీద తోడేళ్లు దాడి చేసిన విధంగా 20 ఏళ్లుగా తన వెంట ఉన్న నాయకులను మంత్రి గంగుల బెదిరింపులకు గురి చేస్తున్నారని ఆయన పరోక్షంగా విమర్శలు గుప్పించారు.మరోవైపు ఇల్లంతకుంట మండలానికి చెందిన సర్పంచులు, ప్రజాప్రతినిధులు ఈటలను కలిసి తమ మద్దతు ప్రకటించగా ఆదివారం సీన్ రివర్స్ అయింది. హుజూరాబాద్‌ జెడ్పీటీసీ బక్కారెడ్డి, ఎంపీపీ రాణి సురేందర్‌రెడ్డి, జమ్మికుంట ఎంపీపీ దొడ్డె మమత, వీణవంక ఎంపీపీ రేణుక తిరుపతిరెడ్డి తదితరులు ఆదివారం మంత్రి గంగుల నివాసంలో ఆయనతో భేటీ అయ్యారు. తమతో పాటు ఎంపీటీసీలు, సర్పంచులు కూడా ఈటల వద్దకు వెళ్లే ఆలోచన చేయడం లేదని స్పష్టం చేశారు. కేసీఆర్‌ నాయకత్వంపై పార్టీ శ్రేణుల్లో సంపూర్ణ విశ్వాసం ఉందని వ్యాఖ్యానించారు. ఈటలను కేబినెట్ నుంచి బర్తరఫ్‌ చేయడం వల్ల స్థానిక నాయకులకు స్వేచ్ఛ లభించిందన్నారు.
పార్టీ ప్రజాప్రతినిధులతో సమావేశమైన మంత్రిగంగుల. మంత్రిగంగుల కమలాకర్ మాట్లాడుతూ... హుజూరాబాద్‌ నియోజకవర్గంలోని వివిధ గ్రామాల్లో నెలకొన్న ప్రతి సమస్యను పరిష్కరిస్తామన్నారు. ప్రతి కార్యకర్తకు పార్టీ అండగా ఉంటుందని హామీ ఇచ్చారు, తాను హుజురాబాద్‌ ప్రజలకు నిత్యం అందుబాటులో ఉంటానని, పార్టీ అధిష్టానం మనతోనే ఉన్నదని చెప్పారు.మరోవైపు జమ్మికుంట మున్సిపల్‌ వైస్‌ చైర్మన్‌ స్వప్నతో పాటు కౌన్సిలర్లు మేడిపల్లి రవీందర్, రావికంటి రాజు, పాతకాల రమేష్, దిడ్డరాము, ఎలగందుల స్వరూప, దేశిని రాధ, పొనగంటి రాము, సదానందం, సారంగం , పిట్టల శ్వేత, శ్రీపతి నరేష్, కుతాడి రాజయ్య తదితరులు ఈటలకు మద్దతు ప్రకటించారు. అధికారులను బదిలీ చేసి, ప్రజా ప్రతినిధులను భయభ్రాంతులకు గురి చేయడం ద్వారా లబ్ధి పొందాలని చూస్తున్న వారి ఆటలు సాగనివ్వమని వారు పేర్కొన్నారు