న్యూయార్క్, మే 26, 
భారత నటీనటులు హాలీవుడ్ చిత్రాల్లో కనిపించడం, నటించడం అనేది గొప్పగా భావిస్తుంటారు. ఇక అక్కడి చిత్రాల్లో నటించి మెప్పించిన వారు కూడా చాలా మందే ఉన్నారు. ప్రస్తుతం ఉన్న స్టార్ హీరోల్లో హాలీవుడ్ స్థాయిని అందుకునే వారు చాలా తక్కువ మంది ఉన్నారు. అయితే ఉన్న కొద్ది మంది హీరోల్లో ప్రస్తుతంప్రభాస్ స్థాయి అంతర్జాతీయంగా ఉంది. బాహుబలి సినిమాలతో ప్రభాస్ ప్రపంచ సినీ రంగంలో ముద్ర వేశారు.ప్రస్తుతం ప్రభాస్ ప్లాన్స్ అన్నీ కూడా ప్యాన్ ఇండియా, ప్యాన్ వరల్డ్ స్థాయిలోనే ఉంటున్నాయి. నాగ్ అశ్విన్‌తో చేయబోయే సినిమా అంతర్జాతీయ స్థాయిలో ఉంటుందని తెలుస్తోంది. అయితే ప్రస్తుతం ప్రభాస్ మీద ఒక వార్త నెట్టింట్లో హల్చల్ చేస్తోంది. హాలీవుడ్ చిత్రంలో ప్రభాస్ నటించబోతోన్నట్టు రూమర్లు బయటకు వచ్చేశాయి.ప్రభాస్ ‘రాధే శ్యామ్’ కోసం ఇటలీలో షూట్ జరుగుతున్న సమయంలో హాలీవుడ్ సూపర్ హిట్ చిత్రం ఫ్రాంచైజ్ ‘మిషన్ ఇంపాజిబుల్ 7’ షూట్ కూడా అక్కడే జరిగిందని, ఆ సమయంలో ఆ సినిమా దర్శకుడు క్రిస్టోఫర్ మాక్ క్వరీ ప్రభాస్ తో మాట్లాడ్డం జరిగింది అని.. కథ చెప్పడం, అది నచ్చి ప్రభాస్ కూడా ఓకే చెప్పాడంటూ వార్తలు వైరల్ కాసాగాయి.అయితే ఇలా వార్తలు వైరల్ కావడంతో.. ఓ నెటిజన్ ఏకంగా సదరు హాలీవుడ్ దర్శకుడు క్రిస్టోఫర్ మాక్ క్వరీకే ట్వీట్ వేసి అసలు విషయం బయటకు లాగాడు. ఇండియన్ హీరో ప్రభాస్ మిషన్ ఇంపాజిబుల్7లో నటించబోతోన్నట్టు వార్తలు వస్తున్నాయ్. అది నిజమా? సర్ అని అడిగేశాడు. దానికి సదరు దర్శకుడు స్పందిస్తూ.. ప్రభాస్ చాలా టాలెంటెడ్ అని కానీ తాము అయితే ఎప్పుడు కలవలేదని క్లారిటీ ఇచ్చారు. దీంతో ప్రభాస్ హాలీవుడ్ ఎంట్రీ రూమర్లకు చెక్ పడ్డట్టైంది.