విజయవాడ, మే 30,
కరోనా మహమ్మారి దేశాన్ని అతలాకుతలం చేసేసింది. నేటికీ లక్షల్లో పాజిటివ్ కేసులు నమోదవుతున్నాయి. కరోనా తొలివేవ్‌లో వయస్సు పైబడిన వారు తీవ్ర ఇబ్బందులు ఎదుర్కొన్నారు. అప్పటికి కరోనా వైరస్ నిర్ధారణ పరీక్షలు, చికిత్సా విధానంపై నిర్దిష్ట విధానాలు లేకపోవడంతో పెద్దసంఖ్యలో జనం మృత్యువాతపడ్డారు. ప్రస్తుతం సెకండ్ వేవ్ ఉధృతి కొనసాగుతోంది. కరోనా వైరస్‌ను కట్టడి చేసేందుకు ఔషధాలు, వ్యాక్సిన్లు అందుబాటులోకి వచ్చినా మ్యుటెంట్ వేరియేషన్ కారణంగా ఎక్కువ మంది వైరస్ బారిన పడుతున్నారు సెకండ్ వేవ్‌లో కరోనా వైరస్ యువతపై ఎక్కువగా ప్రభావం చూపింది. యువతీయువకులు భారీగా కరోనా బారినపడ్డారు. సుమారు 90 శాతం మంది తిరిగి కోలుకున్నా వైరస్ ప్రభావం మాత్రం తీవ్రంగా ఉంది. ఇప్పుడిప్పుడే సెకండ్ వేవ్ తగ్గుముఖం పడుతుండగా.. దేశంలో మూడో వేవ్ రావడం కూడా ఖాయమని వైద్య నిపుణులు హెచ్చరిస్తున్నారు. అయితే ఈసారి వైరస్ చిన్నారులపై ఎక్కువ ప్రభావం చూపే అవకాశం ఉందని చెబుతుండడం ఆందోళన కలిగిస్తోంది.3వ వేవ్ హెచ్చరికల నేపథ్యంలో ఏపీ ప్రభుత్వం కీలక చర్యలు చేపట్టింది. చిన్నారులపై తీవ్ర ప్రభావం ఉంటుందన్న హెచ్చరికల నేపథ్యంలో వైఎస్ జగన్ సర్కార్ ముందుచూపుతో వ్యవహరించింది. పీడియాట్రిక్ కోవిడ్‌ - 19 టాస్క్‌ఫోర్స్ కమిటీని ఏర్పాటు చేసింది. చిన్నారులకు కోవిడ్ వైరస్ సోకితే తీసుకోవాల్సిన జాగ్రత్తలు, వైద్య సేవలు తదితర విషయాలపై అధ్యయనం చేసేందుకు టాస్క్‌ఫోర్స్‌ను ఏర్పాటు చేస్తూ ప్రభుత్వం ఉత్తర్వులు జారీ చేసింది. ఏపీఎంఎస్‌ఐడీసీ చంద్రశేఖర్ రెడ్డి ఆధ్వర్యంలో ఈ టాస్క్‌ఫోర్స్ టీం పనిచేయనుంది.