హైదరాబాద్, జూన్ 4,
ప్రస్తుతం ఉన్న కాలంలో ఏదైనా ఓ సినిమా హిట్ అవ్వాలన్నా, బజ్ క్రియేట్ అవ్వాలన్నా కూడా ఆడియో అనేది ఎంతో ముఖ్యంగా మారింది. పాటలు బాగుంటే సినిమా మినిమం గ్యారెంటీ అనే ముద్ర పడుతుంది. అందుకు ఇప్పుడు మేకర్స్ అంతా కూడా ఆడియోపైన దృష్టి పెట్టారు. ఒక్క పాట హిట్టై సినిమా థియేటర్లకు జనాలను రప్పించే సత్తా మ్యూజిక్ డైరెక్టర్లకు ఉంటుంది.
అలా www సినిమా నుంచి ఐదారు రోజుల క్రితం ఓ పాటను విడుదల చేశారు. అదిత్‌ అరుణ్, శివాని రాజశేఖర్‌ హీరో హీరోయిన్లుగా నటిస్తున్న ఈ చిత్రాన్ని రామంత్ర క్రియేషన్స్ పతాకంపై డా. రవి పి. రాజు దాట్ల నిర్మిస్తున్నారు. ఈ చిత్రంలోని ‘కన్నులు చెదిరే..’లిరికల్ వీడియో సాంగ్ ను ఇటీవ‌ల `మేజ‌ర్‌` అడవి శేష్ రిలీజ్ చేసిన సంగతి తెలిసిందే. అయితే ఈ పాట ఇప్పుడు యూట్యూబ్‌లో ట్రెండ్ అవుతోంది.ఆదిత్య మ్యూజిక్ ద్వారా విడుద‌లైన ఈ పాట శ్రోత‌ల‌ని ఆక‌ట్టుకుంటూ యూట్యూజ్‌లో 1 మిలియ‌న్‌కి పైగా వ్యూస్‌ని సాధించింది. అనంత శ్రీరామ్‌ లిరిక్స్‌ , యాజిన్‌ నిజార్‌ గాత్రం.. సైమన్‌ కె కింగ్‌ బాణీ అన్నీ కూడా చక్కగా కుదిరాయి. ఇలా తమ పాట ఇంతటి ఆదరణను దక్కించుకున్నందుకు నిర్మాత డా. రవి పి.రాజు దాట్ల మాట్లాడుతూ.. 1 మిలియ‌న్‌కి పైగా ఆర్గానిక్ వ్యూస్‌ని సొంతం చేసుకోవ‌డం చాలా సంతోషంగా ఉంది. ఈ సంద‌ర్భంగా ఈ పాట విడుద‌ల చేసిన అడివిశేష్‌కి మ‌రియు ఆదిత్య మ్యూజిక్‌కి ధ‌న్య‌వాదాలు తెలియ‌జేస్తున్నామని అన్నారు. 118 లాంటి డిఫరెంట్ కాన్సెప్ట్‌ను తెరకెక్కించిన గుహన్.. ఇప్పుడు ఇలా wwwతో మరో ప్రయోగాన్ని చేస్తున్నారు. ఈ కరోనా పరిస్థితులు చక్కబడిన వెంటనే విడుదల తేదీని ప్రకటిస్తామని అన్నారు.