నేషనల్ అవార్డ్ విన్నింగ్ యాక్ట్రెస్ కీర్తి సురేష్ టైటిల్‌ పాత్రలో నటించిన లేడీ ఓరియెంటెడ్ మూవీ `గుడ్ లక్ సఖి` ఆది పినిశెట్టి మేల్ లీడ్ పోషిస్తున్న ఈ చిత్రంలో విల‌క్ష‌ణ న‌టుడు జగపతి బాబు కీలక పాత్రలో నటిస్తున్నారు. నగేష్ కుకునూర్ దర్శకత్వం వహిస్తున్న `గుడ్ లక్ సఖి` సినిమాని తెలుగు, తమిళ మరియు మలయాళ భాషలలో ఏకకాలంలో రూపొందిస్తున్నారు. ప్ర‌ముఖ నిర్మాత  దిల్‌రాజు  సమర్పణలో 'వర్త్ ఏ షాట్ మోషన్ ఆర్ట్స్' బ్యానర్ పై సుధీర్ చంద్ర ప‌దిరి,  శ్రావ్య వర్మ ఈ చిత్రాన్ని నిర్మిస్తున్నారు. ఇప్పటికే షూటింగ్ పూర్తి చేసుకున్న ఈ చిత్రాన్ని జూన్ 3న రిలీజ్ చేయాలని ప్లాన్ చేశారు మేక‌ర్స్‌. అయితే కోవిడ్ -19 సెకండ్ వేవ్ కారణంగా అన్ని సినిమాల మాదిరిగానే 'గుడ్ లక్ సఖి' చిత్రాన్ని కూడా వాయిదా వేయాల్సి వచ్చింది. అయితే గత కొన్ని రోజులుగా 'గుడ్ లక్ సఖి' చిత్రాన్ని డైరెక్ట్ ఓటీటీలో రిలీజ్ చేయబోతున్నారంటూ రూమర్స్ వస్తున్నాయి. ఈ నేపథ్యంలో తాజాగా ఈ పుకార్లపై స్పందించారు మేక‌ర్స్‌.   ఈ సంద‌ర్భంగా చిత్ర నిర్మాతలు మాట్లాడుతూ - ``'గుడ్ లక్ సఖి' సినిమా ఓటీటీలో విడుదల కానుందని మీడియాలో వస్తున్న వార్తలు  పూర్తిగా అవాస్తవం.. దయచేసి పుకార్లను స్ప్రెడ్ చేయ‌కండి. ఏదైనా న్యూ అప్డేట్ ఉంటే స్వయంగా మేమే వెల్లడిస్తాం. ప్రతి ఒక్కరూ ఇంట్లోనే  ఉండి సురక్షితంగా ఉంటారని ఆశిస్తున్నాం`` అన్నారు. ఓ గ్రామీణ యువతి అంతర్జాతీయ షూటర్ గా ఎలా మారిందనే కథాంశంతో ఈ చిత్రాన్ని రూపొందిస్తున్నారు. స్పోర్ట్స్ రోమ్‌-కామ్‌గా తెర‌కెక్కుతోన్న ఈ చిత్రంలో కీర్తి సురేష్ షూట‌ర్‌గా క‌నిపించ‌నుంది. రాక్ స్టార్ దేవిశ్రీ ప్రసాద్ సంగీతం సమకూరుస్తుండ‌గా చిరంతాన్ దాస్ సినిమాటోగ్రఫీ బాధ్య‌త‌లు నిర్వ‌హిస్తున్నారు. ఇప్పటికే ఈ చిత్రం నుండి విడుదలైన పోస్ట‌ర్స్‌, టీజర్ కి విశేష‌మైన ఆద‌ర‌ణ ల‌భిస్తోంది.
తారాగ‌ణం: కీర్తిసురేష్‌, ఆది పినిశెట్టి, జ‌గ‌ప‌తిబాబు తదిత‌రులు