నటనతో అద్భుతాలు చేసిన అందాల తార శ్రీదేవి. భారత్‌లో దాదాపు అన్ని భాషల సినీ పరిశ్రమల్లో ఆమె నటించి మెప్పించారు. అందంలో అతిలోక సుందరి. అభిమానుల ఆరాధ్య దేవత. అలాంటి శ్రీదేవి మరణం సినీ ప్రపంచానికే పెద్ద షాక్. ఎవరూ ఊహించలేని విధంగా ఆమె అకస్మాత్తుగా ఈ లోకాన్ని వీడి వెళ్లిపోయింది. శ్రీదేవి వ్యక్తిగత విషయాలను పక్కనబెడితే ఆమె వివాదాల్లో పెద్దగా కనిపించరు. అయితే.. వివాదాస్పద దర్శకుడు రాంగోపాల్ వర్మ సమసిపోయిన ఓ వివాదాన్ని మరో మారు తెరపైకి తెచ్చారు. బాహుబలి సినిమాలో శ్రీదేవి ఎందుకు నటించలేదో చెప్పి కొత్త వివాదానికి తెర తీశారు.బాహుబలి చిత్రంలో శ్రీదేవి నటించాలనుకుంది. ఆ అవకాశం వచ్చినపుడు నేను ఆమెతో మాట్లాడా. గొప్ప చిత్రంలో నటించే అవకాశం వదులుకోవద్దని సలహా ఇచ్చా. అయితే.. తన భర్త బోనికపూర్ వల్లే శ్రీదేవి బాహుబలిలో నటించే అవకాశాన్ని కోల్పోయింది’ అని వర్మ తెలిపాడు. ఓ ఇంటర్వ్యూ సందర్భంగా వర్మ ఈ సంచలన వ్యాఖ్యలు చేశారు.శ్రీదేవికి కూడా బాహుబలి సినిమాలో నటించాలని ఉండేదని వర్మ పేర్కొన్నారు. కానీ, బోనికపూర్‌కు మాత్రం ఇష్టంలేదని ఆయన చెప్పారు. అంతటితో ఆగకుండా.. ఈ విషయాన్ని బయటకి చెప్పలేకే.. ఆమె అధిక మొత్తంలో పారితోషకం డిమాండ్ చేశారని వర్మ చెప్పాపరు. దీంతో రాజమౌళి వెనక్కి తగ్గారని ఆయన చెప్పుకొచ్చారు. బోనికపూర్ నిర్ణయాల వల్ల శ్రీదేవి కెరీర్ పరంగా చాలా నష్టపోవాల్సింది వచ్చిందని వర్మ ఆరోపించారు.శివగామి పాత్ర కోసం రాజమౌళి తొలుత శ్రీదేవినే సంప్రదించినట్లు దర్శకధీరుడు రాజమౌళి స్వయంగా చెప్పారు. ఆ తర్వాత.. ఆ పాత్ర కోసం రమ్యకృష్ణను ఎంపికచేసుకున్న సంగతి తెలిసిందే. శ్రీదేవి అధిక మొత్తంలో రెమ్యునరేషన్ డిమాండ్ చేయడంతోనే ఇలా జరిగిందని అప్పట్లో వార్తలు చక్కర్లు కొట్టాయి. అయితే.. శ్రీదేవి మాత్రం ఈ వివాదంపై స్పందిచలేదు. బాహుబలి సినిమా విజయం సాధిస్తున్న తరుణంలో.. దర్శకుడు రాజమౌళి అలాంటి సినిమాలు మరిన్ని చేయాలని శ్రీదేవి శుభాకాంక్షలు తెలిపారు. శ్రీదేవి చేసిన ఈ వ్యాఖ్యలు ఆమె హుందాతనానికి నిదర్శనం.