ముంబై, జూన్ 26, 
ప్రపంచంలోని కరోనా పరిస్థితులపై ప్రపంచ ఆరోగ్య సంస్థ (డబ్ల్యూహెచ్ఓ) మరోసారి తీవ్రంగా స్పందించింది. ముఖ్యంగా పేద దేశాలకు టీకా డోస్‌ల విషయంలో ఆందోళన వ్యక్తం చేసింది.డబ్ల్యూహెచ్ఓ డైరెక్టర్ జనరల్ టెడ్రోస్ అధనమ్ గ్యాబ్రియోసిస్ మీడియా సమావేశంలో మాట్లాడుతూ.. పేద దేశాల‌కు క‌రోనా వ్యాక్సిన్లు అందేలా చేయాల‌ని టీకా ఉత్ప‌త్తి చేస్తోన్న దేశాల‌ను కోరారు. ధ‌నిక దేశాల్లో వ్యాక్సినేష‌న్ ప్ర‌క్రియ స‌జావుగానే సాగుతోంద‌ని, పేద దేశాల‌కు మాత్రం డోస్‌లు అంద‌డం లేద‌ని చెప్పారు. క‌రోనాతో ముప్పు లేని యువ‌త‌కు కూడా ధ‌నిక దేశాలు వ్యాక్సిన్లు అందిస్తుండ‌గా అల్పాదాయ దేశాల్లో మాత్రం ఎక్కువ రిస్క్ ఉన్నవారికి కూడా టీకాలు అంద‌డం లేదని ఆయ‌న వ్యాఖ్యానించారు. దీంతో ఆఫ్రికాలో ప‌రిస్థితి దారుణంగా ఉంద‌ని ఆవేదన చెందారు. వారం రోజుల కిందటతో పోల్చి చూస్తే ప్ర‌స్తుతం ఆఫ్రికాలో పాజిటివ్ కేసులు, మ‌ర‌ణాలు 40 శాతం పెరిగాయ‌ని టెడ్రోస్ తెలిపారు. ప్రపంచవ్యాప్తంగా డెల్టా వేరియంట్ వేగంగా వ్యాప్తి చెందుతోంద‌ని ఆందోళన వ్యక్తం చేశారు. ప్ర‌పంచ దేశాల‌కు వ్యాక్సినేష‌న్ అందించ‌డంలో విఫ‌ల‌మ‌వుతున్నామ‌ని.. స‌ర‌ఫ‌రా స‌మ‌స్య‌గా మారింద‌ని ఆయ‌న పేర్కొన్నారు. ఆఫ్రికా దేశాల‌కు వ్యాక్సిన్లు అందజేయాలని ధనిక దేశాలకు డబ్ల్యూహెచ్ఓ అధినేత విజ్ఞ‌ప్తి చేశారు. వ్యాక్సిన్ల విష‌యంలో వివ‌క్ష కొన‌సాగుతోంద‌ని తెలిపారు. ఆఫ్రికా దేశాలు సంక్లిష్టమైన చికిత్సలను ఉపయోగించడంలేదనే వాదనలను తోసిపుచ్చిన టెడ్రోస్.. హెచ్ఐవీ/ ఎయిడ్స్ సంక్షోభంతో పోల్చారు. ఈ వైఖరి గతంలో ఉండేదని, ప్రస్తుతం సరఫరా సమస్య వేధిస్తోందని అన్నారు.కోవిడ్ వ్యాక్సిన్ వేసుకున్నా నిబంధనలు తప్పనిసరిగా పాటించాలని డబ్ల్యూహెచ్ఓ డైరెక్టర్ సూచించారు. వ్యాక్సినేషన్ పూర్తయినా సామూహిక వ్యాప్తి ముప్పు తొలగిపోదన్నారు. ప్రతి ఒక్కళ్లూ తప్పసరిగా మాస్క్ ధరించి, భౌతికదూరం నిబంధనలు పాటించాలని తెలిపారు.మరోవైపు, మిగతావాటితో పోల్చితే అభివృద్ధి చెందిన దేశాలు తమ జనాభాకు కలరా నుంచి పోలీయో వరకూ పెద్ద ఎత్తున వ్యాక్సినేషన్ కొనసాగిస్తున్నాయని డబ్ల్యూహెచ్ఓ అత్యవసర విభాగం చీఫ్ మైక్ ర్యాన్ వ్యాఖ్యానించారు.కరోనా మహమ్మారి మధ్యలో ఉన్న ప్రస్తుత తరుణంలో 'మేము మీకు ఏదైనా ఇవ్వలేం ఎందుకంటే మీరు దానిని ఉపయోగించరు అని మేము భయపడుతున్నాం' అనే పితృస్వామ్య, వలసవాద మనస్తత్వం సరైంది కాదని ర్యాన్ అన్నారు.ప్ర‌పంచ దేశాల‌కు వ్యాక్సిన్లు అందించాల‌న్న ఉద్దేశంతో డబ్ల్యూహెచ్‌వో ప్రారంభించిన కోవాక్స్ కార్య‌క్ర‌మానికి టీకాల స‌ర‌ఫ‌రాలో జాప్యం జ‌రుగుతోంది. ఆస్ట్రాజెనికా, సీరం, జాన్స‌న్ అండ్ జాన్స‌న్ సంస్థ‌ల నుంచి ఈ నెల‌లో ఒక్క డోసు కూడా అంద‌లేద‌ని డ‌బ్ల్యూహెచ్‌వో తెలిపింది. క‌రోనా విజృంభ‌ణ నేప‌థ్యంలో భార‌త్ వ్యాక్సిన్ల ఎగుమ‌తిని నిలిపివేసింది. దీంతో సీరం నుంచి డబ్ల్యూహెచ్‌వోకు అందాల్సిన వ్యాక్సిన్లు పెద్ద మొత్తంలో నిలిచిపోయాయి. ఫిబ్రవరి నుంచి కోవాక్స్ ద్వారా 132 దేశాలకు 90 మిలియన్ల కోవిడ్ వ్యాక్సిన్ డోస్‌లను సరఫరా చేశారు.