సూపర్ స్టార్ రజనీకాంత్‌ హీరోగా నటించిన తాజా చిత్రం ‘కాలా’. ‘కబాలి’ చిత్రానికి దర్శకత్వం వహించిన పా.రంజిత్ ఈ సినిమాను తెరకెక్కించారు. రజినీకాంత్ అల్లుడు ధనుష్ సమర్పణలో ఉండర్‌బార్ ఫిల్మ్స్, లైకా ప్రొడక్షన్స్ సంయుక్తంగా నిర్మిస్తున్నాయి. ‘కబాలి’లో కొత్త రజినీకాంత్ చూపించిన దర్శకుడు రంజిత్.. ఇప్పుడు ‘కాలా’లోనూ తలైవాను డిఫరెంట్‌గా చూపిస్తున్నారు. ‘కాలా’ ఫస్ట్‌లుక్ విడుదలతోనే ఈ సినిమాపై భారీ అంచనాలు ఏర్పడ్డాయి. ఇక టీజర్‌తో సూపర్ స్టార్ తన స్టామినాను చూపించారు. ముంబైలో తమిళుల కోసం పోరాడే డాన్ పాత్రలో రజినీ కనిపించనున్నారు.ఇదిలా ఉంటే, ఈ సినిమాలోని తొలి పాటను మేడే సందర్భంగా మంగళవారం విడుదల చేశారు. తెలుగు, తమిళం, హిందీ భాషల్లో విడుదలైన ఈ పాట ప్రస్తుతం యూట్యూబ్‌లో హల్ చల్ చేస్తోంది. ముఖ్యంగా తెలుగులో ‘యమ గ్రేటు’ అంటూ సాగిన ఈ ర్యాప్ సాంగ్ ‘కబాలి’లోని ‘నిప్పురా.. తాకరా..’ పాటను గుర్తుచేస్తోంది. సంగీత దర్శకుడు సంతోష్ నారాయణన్ మరోసారి వెరైటీ బీట్, ట్యూన్‌తో అదరగొట్టాడు. ఈ పాటకు తెలుగు లిరిక్స్‌ను ప్రణవ్ చాగంటి అందించారు. మొత్తం మీద మంచి మాస్ సాంగ్‌తో ‘కాలా’గా తలైవా ఎంట్రీ ఇచ్చారు.మే 9న ‘కాలా’ పూర్తి ఆడియోను విడుదల చేయనున్నారు. అలాగే సినిమాను జూన్ 7న విడుదల చేస్తారని అంటున్నారు. అయితే అధికారికంగా ఇంకా ఖరారు చేయలేదు. ఈ సినిమాలో బాలీవుడ్ నటుడు నానా పటేకర్ ప్రతినాయకుడు పాత్రలో నటించారు. ఇక హుమాఖురేషి, సముద్రఖని, ఈశ్వరీరావు, సంపత్ రాజ్, సాయాజీ షిండే, అంజలి పాటిల్, మణికందన్ కీలక పాత్రల్లో నటించారు.