బాలయ్య రూపొందించ సంకల్పించిన ‘ఎన్టీఆర్’ సినిమా దర్శకత్వ బాధ్యతల నుంచి తేజ తప్పుకోవడంతో ఆ స్థానంలోకి ఎవరొస్తారు? అనేది ఆసక్తిదాయకంగా మారింది. తేజ తప్పుకున్న దగ్గర నుంచి చాలా మంది దర్శకుల పేర్లు ఈ సినిమా విషయంలో వినిపించాయి. అయితే ఎవరు బాధ్యతలు తీసుకుంటారనే అంశం గురించి స్పష్టత లేదు.సీనియర్ దర్శకుడు కే రాఘవేంద్రరావు ఈ ప్రాజెక్టును చేపట్టబోతున్నారని మొదట్లో వార్తలు వచ్చాయి. అలాగే క్రిష్, కృష్ణవంశీల పేర్లు కూడా వినిపించాయి. అయితే వాళ్ల విషయంలో కూడా అధికారిక ప్రకటన లేదు. అలాగే రచయిత సాయిమాధవ్ బుర్రా పేరు కూడా ఎన్టీఆర్ సినిమా దర్శకత్వం విషయంలో వినిపించింది. ఇలా సాగుతున్న ప్రచారంలోకి మరో దర్శకుడి పేరు వచ్చింది. ఈ సారి చంద్ర సిద్ధార్థ వంతు. ఆ నలుగురు, మధుమాసం, అందరి బంధువయా, ఏమో గుర్రం ఎగరావచ్చు.. వంటి సినిమాల రూపకర్త ఈ దర్శకుడు. ఎన్టీఆర్ బయోపిక్ బాధ్యతలు ఈ దర్శకుడికి దక్కుతాయని, బాలయ్య ఈ మేరకు డిసైడ్ చేశాడని ప్రచారం జరుగుతోంది. ఈ విషయంలోనూ అధికారిక ప్రకటన ఏమీ లేదు కానీ, ఇంతకీ ఎన్టీఆర్ సినిమా దర్శకత్వ బాధ్యతలు ఎవరు తీసుకుంటారనేది మాత్రం ఆసక్తిదాయకం.