అల్లు అర్జున్ హీరోగా వస్తోన్న ‘నా పేరు సూర్య - నా ఇల్లు ఇండియా’ సినిమాపై భారీ అంచనాలే ఉన్నాయి. మే 4న విడుదలవుతున్న ఈ సినిమా కోసం ఆయన అభిమానులతో పాటు ప్రేక్షకులు ఆసక్తిగా ఎదురుచూస్తున్నారు. ఈ సినిమాలో బన్నీ ఆర్మీ అధికారి పాత్రలో నటిస్తుండటం.. టీజర్, ట్రైలర్లు అదిరిపోవడంతో అంచనాలు భారీగా పెరిగిపోయాయి. ప్రతి సినిమాలో తన పాత్రధారణను కొత్తగా చూపించే బన్నీ.. ఈ చిత్రంలోనూ ఫ్రెష్ లుక్‌తో ఆకట్టుకుంటున్నాడు. ఇదిలా ఉంటే.. ‘నా పేరు సూర్య’ భారీ చిత్రం కావడంతో తొలి వారంలోనే ఎలాగైనా వసూళ్లు రాబట్టాలని నిర్మాతలు చూస్తున్నారు. అందుకనే ఆంధ్రప్రదేశ్‌లో ప్రత్యేక షోలు వేయాలని నిర్ణయించారు. ఈ మేరకు ఏపీ ప్రభుత్వం నుంచి అనుమతి కూడా పొందారు. మే 4వ తేదీ నుంచి 11వ తేదీ వరకు రోజూ ఉదయం 5 నుంచి 10 గంటల మధ్య రాష్ట్రంలోని అన్ని థియేటర్లలో ప్రత్యేక షోలు వేసుకోవడానికి ఆంధ్రప్రదేశ్ ప్రభుత్వం అనుమతి ఇచ్చింది. ఈ మేరకు ఒక ప్రకటనను కూడా విడుదల చేసింది. అల్లు అర్జున్‌కు ఉన్న ఫాలోయింగ్ అందరికీ తెలిసిందే. దీనికి తోడు ఈ సినిమాపై ఇప్పటికే అంచనాలు భారీగా పెరిగిపోవడం, వేసవి సెలవులు కావడంతో ప్రేక్షకుల తాకిడి ఎక్కువగా ఉంటుందని అంచనా వేస్తున్నారు. అందుకే బ్లాక్ టిక్కెట్ల బెడద, శాంతి భద్రతలకు ఎలాంటి ఆటంకం కలగకుండా ఉండేందుకు ఎనిమిది రోజులపాటు ఉదయం ప్రత్యేక షో వేయడానికి అనుమతించినట్లు ప్రభుత్వ ప్రకటన పేర్కొంటోంది. కాగా, ఈ సినిమాలో అల్లు అర్జున్ సరసన అను ఇమ్మానుయేల్ హీరోయిన్‌గా నటించింది. రచయిత వక్కంతం వంశీ దర్శకుడిగా పరిచయమవుతున్నారు. లగడపాటి శిరీషా శ్రీధర్ నిర్మాతగా, బన్నీ వాస్ సహ నిర్మాతగా కె.నాగబాబు సమర్పమణలో ఈ సినిమా తెరకెక్కింది. బాలీవుడ్ సంగీత ద్వయం విశాల్-శేఖర్ సంగీతం అందించారు.