కత్తి మహేష్ ను వాడుకుని వదిలేశారు
మందా కృష్ణ కామెంట్స్
హైదరాబాద్, జూలై 14,
సినీ నటుడు, దర్శకుడు, క్రిటిక్ కత్తి మహేష్‌ను అధికార వైఎస్సార్ కాంగ్రెస్ పార్టీ రాజకీయంగా వాడుకుని, అవసరం తీరిన తర్వాత కరివేపాకులా పక్కన పెట్టిందని ఎమ్మార్పీఎస్ వ్యవస్థాపక అధ్యక్షుడు మంద కృష్ణ మాదిగ అన్నారు. అలాగే కత్తి మహేష్ మృతి పట్ల అనుమానాలు వ్యక్తమవుతున్నాయని చెప్పారు. నెల్లూరు జిల్లాలో జూన్ 26న జరిగిన రోడ్డు ప్రమాదంలో గాయపడ్డ కత్తి మహేష్.. చెన్నై అపోలో ఆస్పత్రిలో చికిత్స పొందుతూ శనివారం కన్నుమూశారు. అయితే, కత్తి మహేష్ మృతి పట్ల ఎమ్మార్పీఎస్ అధినేత మంద కృష్ణ మాదిగ అనుమానాలు వ్యక్తం చేశారు. కత్తి మహేష్ మరణం తర్వాత ఆయనకు ఎంతో మంది శత్రువులు ఉన్నారని రుజువయిందన్నారు. ఆయన చనిపోయిన తర్వాత కూడా సోషల్ మీడియాలో దారుణమైన పోస్టులు పెడుతున్నారని ఆవేదన వ్యక్తం చేశారు.ఇక, కారులో ముందు సీట్లో కూర్చున్న కత్తి మహేష్ చనిపోయాడని.. కానీ, పక్కనే కూర్చున్న వ్యక్తికి చిన్న గాయం కూడా కాలేదని మంద కృష్ణ మాదిగ గుర్తు చేశారు. ప్రాణహాని లేదంటూ చెన్నైకి తరలించారని.. రెండు కళ్లలో ఒకటి తీసివేస్తామని తొలుత చెప్పారని పేర్కొన్నారు. కళ్లు తప్ప ఎక్కడా గాయాలు లేనప్పుడు ఎలా చనిపోయారని మంద కృష్ణ మాదిగ అనుమానాలు వ్యక్తం చేశారు. గత 15 రోజులుగా సమస్య ఉత్పన్నం కానప్పుడు.. ఐదు నిమిషాల ముందే ఎలా సమస్య వచ్చిందని ప్రశ్నించారు. ప్రాణహాని లేదంటూనే ప్రాణం ఎలా పోయిందని నిలదీశారు. కత్తి మహేష్ మృతిపై సిట్టింగ్ జడ్జితో విచారణ జరిపించాలని డిమాండ్ చేశారు.ఇక, వైఎస్ జగన్మోహన్ రెడ్డి ఆంధ్రప్రదేశ్‌కు ముఖ్యమంత్రి కావాలని కత్తి మహేశ్ ఎంతగానో ప్రచారం చేశారని మంద కృష్ణ మాదిగ గుర్తు చేశారు. తన సామాజికవర్గానికి మహిళా నేతను కూడా కాదని, తిరుపతి ఉప ఎన్నికలో వైసీపీ అభ్యర్థి గురుమూర్తి గెలుపు కోసం కత్తి మహేష్ తీవ్రంగా కృషి చేశారని గుర్తు చేశారు. అలాంటి కత్తి మహేష్ చనిపోతే ముఖ్యమంత్రి వైఎస్ జగన్మోహన్ రెడ్డి కనీసం సంతాప ప్రకటన కూడా చేయలేదని మందకృష్ణ విమర్శించారు.
మహేష్ భౌతిక కాయానికి చెవిరెడ్డి భాస్కరరెడ్డి సహా ఏ ఒక్క వైసీపీ ఎమ్మెల్యే కూడా నివాళులర్పించకపోవడం అన్యాయమని దుయ్యబట్టారు. దళితులంటే ఇంకా చులకన భావమే ఉందని, గౌరవం, గుర్తింపు ఇవ్వబోరని మరోసారి అర్థమైందని మందకృష్ణ అన్నారు. తమను ఎక్కడైనా కరివేపాకులాగే తీసేస్తారని దీంతో అర్థమైందని మంద కృష్ణ మాదిగ ఆవేదన వ్యక్తం చేశారు.