క్యాస్టింగ్ కౌచ్ వివాదంతో టాలీవుడ్‌ ఉక్కిరిబిక్కిరి అవుతోంది. చినికిచినికి గాలివానగా మారిన ఈ వివాదాన్ని పరిష్కరించేందుకు ఇండస్ట్రీ పెద్దలు ఇటీవల పలుదఫాలుగా చర్చలు జరిపారు. మూవీ ఆర్టిస్ట్ అసోసియేషన్ సభ్యులు, ఇండస్ట్రీకి చెందిన ప్రముఖులు సినీ పరిశ్రమలో లైంగిక వేధింపులు నిరోధించేందుకు క్యాష్ కమిటీని ఏర్పాటు చేసిన విషయం తెలిసిందే. తాజాగా సెక్స్‌వల్ హారాస్‌మెంట్‌కి వ్యతిరేకంగా ఒక ప్యానల్‌ని నియమిస్తున్నట్టు టీఎఫ్ఐ ప్రకటనలో తెలిపింది. 

ఇటీవల కొన్ని సంఘటనలల్లో కొంతమంది వ్యక్తులు (శ్రీరెడ్డి) వేరే ఫ్లాట్ ఫాంలో వారి వ్యధ వ్యక్తపరచడం వల్ల సందిగ్ధం ఏర్పడింది. అందుకు పరిశ్రమలోని అన్ని వర్గాలు ఏకమై అన్ని అంశాలను చర్చించి దీర్ఘకాలిక నిర్ణయాలు తీసుకుంటున్నట్టు ఈ ప్రకటనలో తెలిపింది. కొత్తగా ఏర్పాటు చేయబోయే ప్యానల్‌లో యాభై శాతం మంది ప్రతినిధులు ఇండస్ట్రీ బయట వ్యక్తులే ఉంటారు. దీనివల్ల లైంగిక వేధింపుల అంశాలను పారదర్శకంగా చర్చించేందుకు వీలవుతుంది.

వీరిలో డాక్టర్లు, లాయర్లు, ప్రభుత్వ ఉద్యోగులు, విద్యావేత్తలు, సైకాలజిస్టులు మెంబర్లుగా ఉంటారు.మహిళా జూనియర్ ఆర్టిస్టులు, డాన్సర్స్, క్యారెక్టర్ ఆర్టిస్టులకు తగిన విధంగా టాయిలెట్స్, ఛేంజింగ్ రూమ్స్ ఏర్పాటు చేయాలి.ఆడిషన్స్ నిర్వహించేటప్పుడు తప్పనిసరిగా సీసీ కెమెరాలు ఉండాలి. ఒక మహిళా స్టాఫ్ తప్పనిసరిగా అందుబాటులో ఉండాలి. ఆడిషన్స్ నిర్వహించే వారు భాషని సక్రమంగా వాడేలా చూడాలి.కొత్త ప్యానల్‌లో షీ టీంలో ఒక డైరక్ట్ హాట్ లైన్ ఉంటుంది. దీని ద్వారా లైంగిక వేధింపులపై వేగంగా చర్య తీసుకునే అవకాశం ఉంటుంది. ఇ-మెయిల్, పోస్ట్ ద్వారా హెల్ప్ లైన్‌లు నంబర్‌లు అందుబాటులోకి రానున్నాయి