డాక్టర్ కు ఒకేసారి రెండు వేరియంట్లు
గౌహాతి, జూలై 20,
కోవిడ్ సోకిన వ్యక్తికి ఒక వేరియంట్ మాత్రమే ఇప్పటిదాకా చూశాం. కానీ, దేశంలోని తొలిసారిగా ఓ బాధితురాలికి ఒకేసారి రెండు వేరియంట్లు సోకిన ఘటన అసోంలో వెలుగు చూసింది. దిబ్రూగఢ్‌లోని ఇండియన్ కౌన్సిల్ ఆఫ్ మెడికల్ రిసెర్చ్ (ఐసీఎంఆర్)కి చెందిన రీజనల్ మెడికల్ రిసెర్చ్ సెంటర్ (ఆర్ఎంఆర్‌సీ)లో పరీక్ష చేయించుకున్న ఓ వైద్యురాలికి అల్ఫా, డెల్టా రెండు వేరియంట్లు సోకినట్టు గుర్తించారు. ఆమె పూర్తిస్థాయి వ్యాక్సిన్ వేసుకున్నప్పటికీ.. ఆల్ఫా, డెల్టా రకం వేరియంట్ కరోనా సోకిందని ఆర్ఎంఆర్‌సీ పేర్కొంది.అయితే, ఆమె స్వల్ప లక్షణాలే ఉండటంతో ఆసుపత్రిలో చేరకుండానే కోలుకున్నారని తెలిపింది. రెండు వేరియంట్లు ఒకేసారి సోకిన ఘటనలను ‘డబుల్ ఇన్ ఫెక్షన్’ అంటారని ఆర్ఎంఆర్‌సీ సీనియర్ శాస్త్రవేత్త డాక్టర్ బిశ్వజ్యోతి బోర్కకోటీ అన్నారు. ఓ వ్యక్తి ఏదైనా వేరియంట్ బారినపడ్డ రెండు మూడు రోజుల్లో కానీ, లేదా యాంటీబాడీలు ఉత్పత్తి కావడానికి ముందుగా కానీ ఇలా మరో వేరియంట్ కూడా సోకే అవకాశం ఉంటుందని ఆయన చెప్పారు.మే తొలి వారంలోనే ఈ కేసు నమోదైనట్టు అధికారులు పేర్కొన్నారు. వైద్యురాలి భర్తకు తొలుత కోవిడ్ సోకిందని, జన్యు పరీక్షల్లో ఆల్ఫా వేరియంట్ సోకినట్టు నిర్ధారణ అయ్యిందని వివరించారు. వైద్యురాలి నమూనాలను రెండుసార్లు పరీక్షించినట్టు తెలిపారు. ఇటువంటి డబుల్ ఇన్‌ఫెక్షన్ కేసులు చాలా అరుదని ఢిల్లీలోని సీఎస్ఐఆర్ ఐజీఐబీ డైరెక్టర్ డాక్టర్ అనురాగ్ అగర్వాల్ తెలిపారు. తమ ల్యాబొరేటరీలో నిర్వహించిన పరీక్షల్లో డెల్టా ప్లస్ కేసు ఇంత వరకూ నిర్ధారణ కాలేదని అన్నారు.
ఇటీవల బెల్జియానికి చెందిన ఓ 90 ఏళ్ల వృద్ధురాలికి డబుల్ వేరియంట్ గుర్తించారు. అతడిలో అల్ఫా, బేటా ఒకేసారి సోకినట్టు నిర్ధారణ అయ్యింది. అయితే, వ్యాక్సిన్ తీసుకోని ఆమె ఈ ఏడాది మార్చిలో చనిపోయింది.