26 నుంచే  రేషన్ కార్డులు
హైదరాబాద్, జూలై 20, 
తెలంగాణ ప్రజలకు మరో శుభవార్త. ప్రజలు ఆశగా ఎదరు చూస్తున్న కొత్త రేషన్ కార్డుల మంజూరుకు లైన్ క్లియర్ అయ్యింది. ఈ నెల 26 నుంచే అర్హులకు కొత్త రేషన్ కార్డులు మంజూరు చేయనున్నారు. సీఎం కేసీఆర్‌ ఆదేశంతో సివిల్‌ సప్లయ్ అధికారులు అర్హులందరికీ రేషన్‌ బియ్యం అందించే ఏర్పాట్లు చేపడుతున్నారు. ఈ క్రమంలో కొత్త రేషన్‌ కార్డులు మంజూరు చేయనున్నారు. అందిన దరఖాస్తుల మేరకు అధికారులు అర్హులను గుర్తిస్తున్నారు.రెవెన్యూ అధికారులు క్షేత్రస్థాయిలో విచారణ చేపట్టి సివిల్‌ సప్లయ్ శాఖాధికారులకు నివేదిక ఇచ్చారు. ఈ నివేదికలను అధికారులు రాష్ట్ర ప్రభుత్వానికి పంపించనున్నారు. వ్యవసాయ, రవాణా, ఆదాయపన్ను శాఖల సమాచారం మేరకు అర్హులను ఎంపిక చేయడం గమనార్హం. ఏడు ఎకరాలకంటే ఎక్కువ భూమి, ఫోర్ వీలర్ వెహికల్స్ కలిగి ఉండడంతో ఆదాయ పన్ను పరిధిలోకి వచ్చిన దరఖాస్తులను అధికారులు తిరస్కరించారు. అంతే కాకుండా కొత్త రేషన్ కార్డులు లభించన వారికి వచ్చేనెల అంటే ఆగష్టు నుంచే రేషన్‌ బియ్యం పంపిణీ చేయనున్నారు.