హూజూరాబాద్ కు ఎన్ఆర్ఐ  అభ్యర్ధి
కరీంనగర్, జూలై 24
హుజురాబాద్ ఉపఎన్నికలో అభ్యర్థి విషయంలో టీఆర్ఎస్ పార్టీ అనేక కసరత్తులు చేస్తోంది. ఇప్పటికే గెల్లు శ్రీనివాస్ యాదవ్, కౌశిక్ రెడ్డి పేర్లు పరిశీలనలో ఉండగా, ఆ మధ్య కొత్తగా చేరిన ఎల్.రమణను కూడా హుజురాబాద్ అభ్యర్థిగా నిలబెడతారని వార్తలు వచ్చాయి. కానీ అవన్నీ ఊహాగానాలే అని తేలిపోయాయి. హుజురాబాద్ అభ్యర్థిగా రెడ్డి సామాజిక వర్గానికి చెందిన వ్యక్తినే నిలబెట్టాలని కేసీఆర్ అనుకుంటున్నాడని అందుకే టీఆర్ఎస్ పార్టీకి నమ్మిన బంటుగా ఉన్న గెల్లు శ్రీనివాస్ యాదవ్‌కు టికెట్ ఇవ్వట్లేదని పార్టీ వర్గాలు భావిస్తున్నారు. రెడ్డి సామాజిక వర్గంలో మాజీ మంత్రి ముద్దసాని దామోదర్ రెడ్డి సోదరుడు ముద్దసాని పురుషోత్తం రెడ్డి పేరును పరిశీలించినప్పటికీ వయసు రీత్యా ఆయన్ని పక్కన పెట్టారని తెలుస్తుంది.అయితే, ఇదిలా ఉండగా మళ్లీ ఇంకొక కొత్త పేరు కేసీఆర్ పరిశీలనలోకి వచ్చింది. హుజురాబాద్ నియోజకవర్గంలోని వీణవంక మండలానికి ఆనుకొని ఉన్న అన్నారం గ్రామానికి చెందిన ఎన్ఆర్ఐ పాకాల శ్రీకాంత్ రెడ్డిని టీఆర్ఎస్ అభ్యర్థిగా బరిలోకి దింపితే ఎలా ఉంటుందన్నది పరిశీలిస్తున్నారు. దాదాపుగా ఈ అభ్యర్థినే నిలబెడతారని ప్రచారం జరుగుతుంది.హుజురాబాద్‌లో టీఆర్ఎస్ నుండి పోటీ పట్ల ఎన్ఆర్ఐ శ్రీకాంత్ రెడ్డి కూడా ఆసక్తి కనబరుస్తున్నారని, ప్రస్తుతం అమెరికాలో ఉన్న శ్రీకాంత్ రెడ్డి ఇప్పటికే ఇండియాకు రావటానికి ఏర్పాట్లు చేసుకున్నారని అంటున్నారు. అన్నారం గ్రామానికి చెందిన శ్రీకాంత్ రెడ్డి సాఫ్ట్ వేర్ రంగంలో స్థిరపడ్డారు. సునేరా కంపెనీ పేరుతో భారతదేశంలో పలు వ్యాపారాలు చేస్తూ ఎంతో మందికి ఉపాధి కల్పించారన్న పేరుంది. ఆర్థికంగా కూడా శ్రీకాంత్ రెడ్డి బలంగా ఉండటంతో టీఆర్ఎస్ అతని వైపే మొగ్గు చూపుతున్నట్లు తెలుస్తుంది. కానీ వీణవంక మండలానికి చెందిన మరో ఎన్ఆర్ఐ ఉదయ్ నందన్ రెడ్డిని కూడా హుజురాబాద్ రంగంలో బరిలోకి దింపుతామని టీఆర్ఎస్ ప్రయత్నించినప్పటికీ కౌశిక్ రెడ్డి టీఆర్ఎస్‌లో చేరటంతో ఆ ఆలోచనను విరమించుకున్నారని తెలుస్తుంది.