అమెరికా అధ్యక్షుడు డొనాల్డ్ ట్రంప్ పాకిస్థాన్‌కు గట్టి సందేశంలాంటి హెచ్చరిక పంపించారు. పాకిస్థాన్ గడ్డపైనున్న ఉగ్రవాద సంస్థలపై స్వయంగా చర్యలు ప్రారంభించారు. పాకిస్థాన్ ఉగ్రవాద సంస్థ హక్కానీ నెట్‌వర్క్‌పై అమెరికా డ్రోన్ దాడి చేసినట్లు తెలుస్తోంది. హక్కానీ నెట్‌వర్క్ టాప్ కమాండర్ ఈ దాడిలో మరణించినట్లు తెలుస్తోంది. మొత్తం మీద ఈ దాడిలో ఇద్దరు ఉగ్రవాదులు హతమైనట్లు సమాచారం.

డొనాల్డ్ ట్రంప్ కొద్ది నెలలుగా హెచ్చరిస్తున్నప్పటికీ పాకిస్థాన్ ప్రభుత్వం ఉగ్రవాద సంస్థలపై చర్యలు తీసుకోవడంలో విఫలమైన సంగతి తెలిసిందే.

పాకిస్థాన్ భద్రతాధికారులు ఓ వార్తా సంస్థకు తెలిపిన వివరాల ప్రకారం వాయవ్య పాకిస్థాన్‌లో ఓ ఇంటిపై డ్రోన్ దాడి జరిగింది. ఇది అమెరికా తీసుకున్న చర్య అని పాకిస్థాన్ అనుమానిస్తోంది. ఈ దాడిలో ఇద్దరు ఉగ్రవాదులు హతమయ్యారు. వీరు ఆఫ్ఘన్ తాలిబాన్‌తో సంబంధాలున్న హక్కానీ నెట్‌వర్క్‌కు చెందినవారు.

డాపా మమోజాయ్‌ అనే గ్రామంలో ఉన్న ఈ ఇంటిపై రెండు క్షిపణులతో దాడి జరిగినట్లు ఈ అధికారులు తెలిపారు. ఈ గ్రామం ఫెడరల్ ప్రభుత్వం పరిపాలిస్తున్న గిరిజన ప్రాంతంలో ఉందని చెప్పారు. ఈ దాడిలో ఉగ్రవాదులు అహ్‌సాన్ ఖొరాయ్, నాజిర్ మెహమూద్ మరణించినట్లు తెలిపారు. వీరిద్దరూ హక్కానీ నెట్‌వర్క్‌కు చెందినవారని తెలిపారు.